Ti Agtultuloy a Panagsaknap Paaduenna iti Kasapulan a Kingdom Hall
1 Idi nabayagen a panawen impadto ti mammadto ni Jehova a “dagiti matarigagayan a bambanag iti amin a nasnasion ket sumrekda.” (Hag. 2:7) Sigurado a makitkitatayo ti katungpalanna kadagitoy nga aldaw. Anian a ragsak a 7,559 ti nabautisaran bayat iti 1993 a tawen ti serbisio ditoy Pilipinas laeng! Tapno matulongan amin dagitoy nga agdadamo, kasapulan nga ‘ipapuso dagiti daldalantayo’ a mangsiguro a supsuportarantayo a naan-anay iti trabaho ti Dios. (Hag. 1:5) Wen, ti nasken a paset iti panangsuportar ti trabaho iti Dios isu ti panangtulong a mangipaay kadagiti balay a pagdayawan dagiti pinangen nga agdadamo a managdayaw ken Jehova.
2 Ti Society Kingdom Hall Fund a nagandaren ditoy Pilipinas iti adun a tawtawen itan ti namagbalin iti 1,013 a kongregasion ti nakagun-od iti baro a Kingdom Hallda. Bayat laeng iti 1993 a tawen ti serbisio, 101 a kongregasion iti 34 a probinsia ti immawat iti pautang nga agpaay ti proyekto a Kingdom Hall. Makaparegta a makita ti tignay dagiti agibumbunannag a nangsuportar iti daytoy agrikrikus a pundo. Ti kuarta a maipabulod kadagiti kongregasion ti maisubli iti pundo tapno amin dagitoy a naidonar ti agtultuloy a mausar a pangipatakder kadagiti baro a Kingdom Hall.
3 Ti Naannad a Plano ken Konsultasion iti Mangisiguro ti Balligi: Iti Lucas 14:28, 29, inwayat ni Jesus ti prinsipio a masapul a maadal dagiti amin a mangirugi iti proyekto a Kingdom Hall. Umuna kasapulan ti ‘tumugaw tapno makarkulo ti magasto, ket makita no adda umdas a pangiringpas’ iti proyekto. Wen, nasken ti naannad a plano. Saan nga umdas iti kinarayray, ngem kasapulan ti intero a kongregasion iti pinansial a suportar a maipaay ti proyekto babaen iti kontribusion. No masaludsod kadagiti kakabsat no mano ti maikontribusionda iti kada bulan, masapul a napudnoda, a saanda nga ikari ti nasursurok ngem iti kabaelanda tapno maalada laeng ti pautang. Nasayaat met no madagdagus a makiddaw kadagiti kakabsat ti agkontribusion uray pay iti sakbay ti panagaplikar iti mautang. Iti kastoy a wagas adda pundo a maurnong ket makita dagiti panglakayen a kabaelan ti kongregasion a suportaran iti proyekto.
4 Ti sabali a maitutop a nainkasuratan a prinsipio isu daytoy Proverbio 15:22, a nagkuna: “Adda pannakapaay dagiti plano no awan iti nalimed a panagsasarita, ngem ti kaadu dagiti mamagbaga adda maibanag.” Kaipapananna dayta a kasapulan dagiti panglakayen ti agkonsulta iti tunggal maysa ken pagsaritaan dagiti bambanag a naannad sakbay a maidatag ti kongregasion. Awan ti maysa a panglakayen nga agwaywayas a mangeddeng kadagiti bambanag. No daytoy ti aramiden dagiti panglakayen, nawadwad a riribuk ken di pagkinnaawatan iti pagtinnaganna. Mainayon pay, kas naisingasing iti insert daydi Disiembre, 1991 a Ti Ministeriotayo iti Pagarian, ti manangaywan iti sirkito ti mapagkonsultaan a maipaay iti balakad. Kasano a makatulong?
5 Ti panangpili iti paglugaran ti patakder ket ramanenna iti adu a bambanag a mainayon idiay presio ti sanikua. Masarakan aya iti sentro dagiti kakabsat? Asideg kadi iti kalsada, wenno adda ti nauneg a lugar? Adda aya nadalus a titulo ti daga? Adda kadi tattao nga agnanaed iti daga a nalabit nga agkedked a pumanaw kalpasan a magatang? Ti manangaywan iti sirkito ti makaited iti balakad kadagitoy a bambanag sakbay a magatang ti lote. Nalabit a makairekomenda met ti kabsat a mangsukimat no awan iti legal a parikut ti titulo. Mainayon pay, sumaruno a sukimaten iti manangaywan ti sirkito iti plano nga impaimaldit dagiti panglakayen, ket mangted ti singasing iti kadakkel ti Kingdom Hall ken iti langana. Sukimatenna pay ti aplikasionda tapno masigurado a masabet amin dagiti reglamento.
6 Apaman a maanamongan ti Sosiedad iti plano, awan koman ti maaramid a dakkel a panangbalbaliw iti disenio wenno kadakkel ti Kingdom Hall ken iti paglugaranna a dipay naikonsulta nga umuna manipud ti Sosiedad. Adda dadduma a kongregasion a binaliwanda iti lugar ti daga wenno disenio iti patakder a dida impakauna iti Sosiedad. Namataud daytoy kadagiti saan a kasapulan a problema.
7 Maisingasing, no mabalin, a ti kongregasion ket ikagumaanna iti gumatang ti daga a matituluan iti nagan ti korporasion iti sirkito sakbay a maipatulod ti aplikasion iti mautang ditoy Sosiedad. Daytoy ti mangpadaras iti pannakaipagna ti utangen idinto ta daytoy daga ket mismon a kukua dagiti kakabsat.
8 Masapul a maidulin nga umiso ken detaliado dagiti rekord ti pinansial manipud pay iti rugi ti panagibangon. Nasayaat no adda dua wenno tallo a kakabsat a mangtaming a sangsangkamaysa iti kuenta tapno maliklikan ti aniaman a supetsa ken di panagkinnaawatan. Iti ngudo ti proyekto, maadda iti kongregasion ti kompleto a rekord iti kuenta nga agpaay ti proyekto.
9 Dagiti Boluntario a Managobra ti Mangpadaras iti Trabaho ken Mangpabassit iti Gastos: Nasayaat nga adayo no mausar dagiti kabaelan a magun-od manipud iti mismo a kongregasion a maipaay ti baro a Kingdom Hall. Awan duadua, kas impakita ni Jesus iti Juan 10:12-15, a ti maysa nga agtrabaho a boluntario a buyogen iti ayat ket nagaggaget ngem ti “natangdanan a tao,” isu nga interesado laeng iti maibayad ken “saanna a patgen dagiti karnero.” Uray no maymaysa laeng ti makabael a kabsat iti maysa a trabaho, makiddaw kenkuana a mangsanay ti dadduma bayat nga aramidenna iti trabaho. Iti kastoy a wagas ad-adu ti agbalin a makabael a tumulong iti dadduma a proyekto ti masakbayan. Ti boluntario a panagbannog iti tumulong a mangpabassit ti gastos, iti kasta mausar a nainsiriban ti napateg a pundo nga impaay dagiti kakabsat. Iti kastoy a pamay-an, ti intero a kongregasion iti mairaman, ket kas idi aldaw ni Nehemias, dagiti kakabsat ti agtultuloy a “mangipapuso iti panagtrabaho.” (Neh. 4:6b) Kalpasan a makompleto ti proyektoda, dagiti kakabsat iti matignay babaen ti ayat a tumulong a mangibangon iti Kingdom Hall dagiti dadduma a kongregasion.—Neh. 5:19; Fil. 2:3, 4.
10 Nasayaat unay no dagiti manangaywan ti sirkito ket ilistada iti sirkitoda dagiti kakabsat a nalaing ti nagduduma a trabaho ken situtulokda nga agboluntario iti proyekto ti Kingdom Hall iti nagduduma a kongregasion. Bayat nga ad-adu pay ti masanay, umadu met dagiti mailista. Kalpasanna, inton kanito nga adda proyekto iti uneg ti sirkito, maysa a grupo dagiti nalaing a managobra iti mangnayon kadagiti lokal a kakabsat babaen ti panangiboluntarioda iti serbisioda, tapno magin-awaan ti lokal a kongregasion iti pakadagsenanna. Ti pannakidanggay iti kastoy a wagas isut’ ebidensia ti ayat kadagiti kaasitgan a kaaruba—dagiti Kristiano a kakabsattayo.—Mat. 7:12; 22:39; Juan 13:35.
11 Panangipakita ti Ayat ken Panangipateg iti Urnos: Laglagipenyo a kada pautang a maipaay iti kongregasion ti nagtaud iti boluntario a kontribusion dagiti kakabsat iti intero a lubong. Sigurado a ditay kayat a paayen iti pannangted ti panagyaman iti daytoy a kinamanagayat dagiti kakabsat, kas kadagiti siam nga agkukutel idi aldaw ni Jesus, saan kadi? (Luc. 11:12-18) Ipakpakita kadi ti panagyaman no agliwaytayo nga agbayad iti utang kas naikari? Panangipakita aya dayta iti ayat ti kakabsattayo iti sabsabali a kongregasion? No basta umawattayo ti tulong a mangibangon iti Kingdom Hall kalpasanna saantayo a maseknan kadagiti sabali a kongregasion nga agkasapulan ti tulong, panangipakita kadi dayta iti espiritu ti Filipos 2:4?
12 Gapu ta maseknantayo, saan laeng a maipaay iti kongregasiontayo, ngem maipaay “ti intero a timpuyog dagiti kakabsat ditoy lubong,” (1 Ped. 5:9) adu a kongregasion iti boluntario a nagresolusion a mangipatulodda ti kontribusion iti Sosiedad nga agpaay ti Kingdom Hall Fund iti kada bulan. Uray pay dagiti dadduma nga addaanen ti utang a bayadan iti Kingdom Hall ket mangipatpatulodda met ti kontribusion iti daytoy a pundo. Anian a nagsayaat nga espiritu ti ipakita daytoy! Laglagipenyo, “naragragsak nga adayo ti mangted ngem iti umawat,” gapuna nga agdadanggaytayo nga agtrabaho kas mannangted a saan laeng a manangawat babaen ti panangtulong kadagiti sabali a kongregasion bayat a kabaelantayo.—Ara. 20:35.
13 Maipateg ti Natulok nga Espiritu: Ti natulok nga espiritu ken regta dagiti kakabsat a mangibangon kadagiti patakder isut’ nabatad kas insurat iti maysa a grupo: “Anian a nagpaiduma a rag-o a makita dagiti Koreano-, Espaniol-, ken Ingles-ti-pagsasaoda a kongregasion a sangsangkatunos nga agtrabaho a maipaay iti nagkaykaysa a panagdayaw ken Jehova!” Pudno, ngarud, dagiti sasao ti Salmo 133:1, 3: “Adtoy! Anian a nagimbag kadagiti agkakabsat ti agnaed a sangsangkamaysa!”
14 Kas panangipateg iti naaramidan a trabaho a maipaay ti Kingdom Hall iti maysa a kongregasion, nagsurat ti mangidaulo a manangaywan: “Agsipud ta adu dagiti nataengan ti edad a kakabsat iti kongregasion, daytoy a proyekto ti saan koma a nairingpas babaen iti bukodmi laeng a pinget. Gapuna a dakkel a panagyaman ti ipaaymi kadakayo ken dagiti kakabsat a kas kadakayo a nakarikna iti ayat ni Jehova ken nagtarigagay, saan laeng a nakarikna, ngem impakitada pay dayta. Kunaenmi kadagiti kakabsatmi: ‘Itultuloyyo ti naimbag a trabahoyo.’”
15 Nagustuan Dagiti Agpalpaliiw: Ti naparang a panagtignay iti nasantuan nga espiritu ni Jehova kadagiti kakabsat a nagtrabaho a nagibangon iti proyekto a Kingdom Hall ti nagserbi a kas pannaksi iti sabsabali. Dagiti material nga agpaay iti maysa a patakder ti nagatang manipud iti kompania dagiti tarikayo, ket kalpasanna nagsurat ti manedyer: “Diak makalagip iti sabali pay a magustuak unay a grupo dagiti tattao ngem kadakayo a Saksi ni Jehova bayat daytoy a proyekto. Agpadpada a makaparagsak ken makaay-ayo kaniak ti mangsaksi iti kasta a pasamak, ket naragsakanak ta nabaelak ti nakibiang uray iti bassit laeng a wagas. Dakayo ken dagiti tattaoyo ti mapadayawan, ket idawdawatko nga agballigikayo pay kadagiti masanguanan a proyektoyo.”
16 Iti maysa a pasamak, maysa a pannakabagi iti managabasto ti nadutokan a mangusar iti tallo nga aldaw a maipaay ti proyekto a Kingdom Hall. Kunana: “Napabaknang ti biagko iti kaaddak kadakayo bayat ti ngudo iti lawas. Ti kapaliiwak kadagiti Saksi ni Jehova ket nagbaliw. Ad-adu pay gayam ti maaramidanyo ngem iti basta kumatok kadagiti ruangan. Maysa a pribilehio ti nakipaset kadakayo. Saankayto koma a masdaaw no addaakto iti palawag ti publikoyo.”
17 Idi nakompleto ti proyekto, nagsurat iti maysa a mayor kas mangibagi ti siodad, a kunana: “Maysa a bang-ar a makita dagiti ginasut a boluntario a nagtrabaho a sangsangkatunos a nangibangon iti patakder a sidadaras. Pudno a nagpintas a patakder. Pagsasaritaan dagiti umili maipapan ti napardas a pannakabangon iti patakder. Ti baro a Kingdom Hall ket pudno a maysa a kredito iti komunidad, ket maipagpannakkelmi ti panangawat iti dayta agraman ti kongregasionyo.”
18 Dagiti Pinansial a Kontribusion ti Agtultuloy a Tumulong: Dagiti nabuslon a kontribusion iti Society Kingdom Hall Fund ti timmulong kadagiti kongregasion iti napalabas ken sigurado nga agtultuloy a kasta iti masanguanan. Saan kadi a ni Jehova a Dios a mismo ket idadaulona iti awan agumna a pannangted? (Sant. 1:17) Bayat a pudno a nagduduma ti kabaelantayo nga ited, masarakantayo a babaen iti panangator ti panaggastotayo, maaddaantayo ti naan-anay a pannakiraman a mangsuportar iti panagibangon a trabaho. Dayta a kinawayawaya ti sigurado a mangyeg iti rag-o ti puso ni Jehova, agraman dakkel a pammaregta iti kakabsattayo.
19 Umad-adu, “dagiti matarigagayan a bambanag” ti agay-ayus nga agturong iti espiritual a templo ni Jehova, ket ‘punnuenna ti balayna iti dayag.’ (Hag. 2:7) Kas kadagiti matalek nga Judio idi tiempo ni Hageo, ipapusotayo koma iti trabaho ti Dios, a suportaran a naan-anay dagiti kasapulan a kanayonan a Kingdom Hall. Agtultuloy ti panagrang-ay iti napartak nga addang. Ti agtultuloy a suportartayo iti Society Kingdom Hall Fund isut’ maysa a nagpaiduma a pamay-an ti pannakiraman iti trabaho ti Dios.