Ti Masursurotayo ken Jesus

Maipapan Kadagiti Kararag a Denggen ti Dios

Masansan a napan ni Jesus iti lugar a mabalinna ti agmaymaysa nga agkararag, ket insingasingna kadagiti adalanna nga aramidenda met ti kasta. Kuna ti Biblia: “Iti kaaddana nga agkarkararag iti maysa a lugar, idi nagsardeng, kinuna kenkuana ti maysa kadagiti adalanna: ‘Apo, isurom kadakami no kasano ti agkararag’ . . . Kinunana kadakuada: ‘No agkararagkayo, kunaenyo, “Ama, masantipikar koma ti naganmo.”’” (Lucas 5:16; 11:1, 2) Gapuna, insuro ni Jesus a dagiti kararag ket rumbeng a maiturong ken Amana a ni Jehova. Isu laeng ti Namarsua kadatayo ken “Managdengngeg iti kararag.”​—Salmo 65:2.

Makaay-ayo kadi iti Dios ti amin a kararag?

Saan a makaay-ayo iti Dios ti panangulit-ulit kadagiti naimemoria a kararag. Kinuna ni Jesus: “No agkarkararagkayo, dikay ulit-uliten a sawen ti isu met laeng a bambanag.” (Mateo 6:7) Masapul a naimpusuan ti pannakisaritatayo iti nailangitan nga Amatayo. Naminsan, impaganetget ni Jesus kadagiti pasurotna a dagiti kararag ti managbasol a sipapasnek nga agbabbabawi ket ad-adda nga awaten ti Dios ngem kadagiti kararag ti natangsit a siiinget a mangan-annurot kadagiti narelihiosuan a kostumbre. (Lucas 18:10-14) Isu a tapno denggen ti Dios dagiti kararagtayo, masapul a sipapakumbaba nga aramidentayo dagiti ipapaaramidna kadatayo. Uray ni Jesus kinunana: “Kas iti insuro kaniak ni Ama sawek dagitoy a banag. . . . Kankanayon nga aramidek ti bambanag a makaay-ayo kenkuana.” (Juan 8:28, 29) Inkararag ni Jesus: “Saan koma a ti pagayatak, no di ket ti pagayatam ti maaramid.”​—Lucas 22:42.

Ania ti rumbeng nga ikararagtayo?

Yantangay adda dagidiay mangum-umsi iti nagan ti Dios, kinuna ni Jesus: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.’” (Mateo 6:9, 10) Rumbeng nga ikararagtayo ti iyaay ti Pagarian ti Dios agsipud ta dayta a gobierno ti usaren ti Dios a mangibanag iti pagayatanna idiay langit ken ditoy daga. Kinuna ni Jesus a mabalintay nga ikararag ‘ti tinapaytayo maipaay iti daytoy nga aldaw.’ Mabalintay met nga ikararag ken Jehova ti maipapan iti panggedan, pagtaengan, kawes, kasasaad ti salun-at, ken dadduma pay a pakaseknan. Kanayonanna, kinuna ni Jesus a rumbeng nga ikararagtayo ti pammakawan ti Dios.​—Lucas 11:3, 4.

Rumbeng kadi nga ikararagantayo ti sabsabali?

Inkararagan ni Jesus ti sabsabali. Kuna kadatayo ti Biblia: “Naiyeg kenkuana dagiti ubbing, tapno ipatayna kadakuada dagiti imana ken mangikararag.” (Mateo 19:13) Imbaga ni Jesus ken apostol Pedro: “Immararawakon maipaay kenka tapno saan nga agkapuy ti pammatim.” (Lucas 22:32) Pinaregta ni Jesus dagiti pasurotna nga ikararaganda ti sabsabali, uray dagidiay mangidaddadanes ken mangin-insulto kadakuada.​—Mateo 5:44; Lucas 6:28.

Apay a rumbeng a reggetantayo ti agkararag?

Nangilatang ni Jesus iti tiempona nga agkararag ken imparegtana kadagiti pasurotna ti “kanayon a panagkararagda ken saanda nga isusuko.” (Lucas 18:1) Aw-awisennatayo ni Jehova a mangyebkas iti panagtalektayo kenkuana babaen ti masansan a panangipeksatayo kenkuana kadagiti pakaseknantayo. “Itultuloyyo ti agdawat, ket maitedto dayta kadakayo,” kinuna ni Jesus. Ngem di kayat a sawen dayta a di masindadaan ni Jehova a mangipangag kadagidiay mangay-ayat ken mangraraem kenkuana kas Ama. Imbes ketdi, kinuna ni Jesus: “No dakayo, nupay nadangkeskayo, ammoyo no kasano ti mangted iti naimbag a sagsagut iti annakyo, anian a nangnangruna pay a ti Ama sadi langit mangtedto iti nasantuan nga espiritu kadagidiay agdawdawat kenkuana!”​—Lucas 11:5-13.

Para iti ad-adu pay nga impormasion, kitaenyo ti kapitulo 17 ti libro nga Ania a Talaga ti Isursuro ti Biblia?a

[Footnote]