Leksion 15

Panangtulong Kadagiti Sabsabali a Mangaramid iti Pagayatan ti Dios

Apay nga ibagayo kadagiti sabsabali ti maad-adalyo? (1)

Siasino ti mabalinyo a pangiranudan iti naimbag a damag? (2)

Ania ti mabalin nga epekto ti kababalinyo kadagiti sabsabali? (2)

Kaano a mabalinyon ti mangasaba a kadua ti kongregasion? (3)

1. Adun ti naadalyo a nasayaat a bambanag iti Biblia. Iturongnakay koma daytoy a pannakaammo a mangpatanor iti Nakristianuan a personalidad. (Efeso 4:22-24) Nasken ti kasta a pannakaammo tapno magun-odyo ti biag nga agnanayon. (Juan 17:3) Nupay kasta, masapul met a mangngeg dagiti sabsabali ti naimbag a damag tapno maisalakanda. Masapul a kasabaan dagiti amin a pudno a Kristiano dagiti sabsabali. Bilin ti Dios daytoy.—Roma 10:10; 1 Corinto 9:16; 1 Timoteo 4:16.

2. Mabalinyo nga irugi babaen ti panangiranud kadagiti nasayaat a banag a maad-adalyo kadagiti asideg kadakayo. Ibagayo dagitoy iti pamilia, gagayyem, kaeskuelaan, ken katrabahuanyo. Nasingpet ken naanuskay koma a mangaramid iti dayta. (2 Timoteo 2:24, 25) Laglagipenyo nga ad-adda nga imutektekan dagiti tao ti kababalin ti maysa ngem ti ibagbagana. Isu a ti nasayaat a kababalinyo mabalin nga awisenna dagiti sabsabali a dumngeg iti mensahe nga ipakpakaammoyo kadakuada.—Mateo 5:16; 1 Pedro 3:1, 2, 16.

3. Iti saan a mabayag, mabalin a kualipikadokayton a mangrugi a mangasaba a kadua ti lokal a kongregasion dagiti Saksi ni Jehova. Napateg nga addang daytoy iti irarang-ayyo. (Mateo 24:14) Anian a makaparagsak no matulonganyo ti sabali a tao nga agbalin nga adipen ni Jehova ken manggun-od iti biag nga agnanayon!—1 Tesalonica 2:19, 20.