Panangusar iti Biblia No Sumungbatka

NO DAMAGENDA ti maipapan iti patpatientayo, kabibiagtayo, panangmatmattayo kadagiti agdama a pasamak, namnamatayo iti masanguanan, ikagumaantay nga usaren ti Biblia no sumungbattayo. Apay? Agsipud ta Sao ti Dios dayta. Ti Biblia ti gubuayan dagiti patpatientayo. Naibatay iti Biblia ti wagas ti panagbiagtayo. Impluensiaanna ti panangmatmattayo kadagiti pasamak ditoy lubong. Ti namnamatayo iti masanguanan ket sititibker a nairamut kadagiti naipaltiing a kari ti Biblia.​—2 Tim. 3:16, 17.

Maseknantayo unay iti responsabilidad a nainaig iti nagantayo. Saksinatayo ni Jehova. (Isa. 43:12) Isu a sungbatantayo dagiti saludsod, saan a sigun iti natauan a pilosopia, no di ket sigun iti kuna ni Jehova iti naipaltiing a Saona. Pudno, kas indibidual addaantayo kadagiti kapanunotan maipapan iti bambanag, ngem palubosantayo ti Sao ti Dios a mangimpluensia iti panangmatmattayo gapu ta naan-anay a kombinsidotayo nga isu dayta ti kinapudno. Siempre, ikkannatayo ti Biblia iti wayawaya nga agpili mainaig iti adu a banag. Imbes nga ipilittayo kadagiti sabsabali ti bukodtayo a kapanunotan, kayattayo nga isuro dagiti prinsipio a nailanad iti Kasuratan, iti kasta, mausar dagiti agim-imdeng ti wayawayada nga agpili a kas kadatayo. Kas ken apostol Pablo, ikagumaantay nga “itandudo ti kinatulnog babaen ti pammati.”​—Roma 16:26.

Iti Apocalipsis 3:14, nadeskribir ni Jesu-Kristo kas “ti matalek ken napudno a saksi.” Kasano ti panangsungbatna kadagiti saludsod ken panangtamingna kadagiti kasasaad a naipasango kenkuana? Adda dagiti tiempo a nagusar kadagiti pangngarig a mamagpanunot kadagiti tattao. Adda met dagiti gundaway a damagenna daydiay agsalsaludsod maipapan iti bukodna a pannakaawat iti maysa a kasuratan. Masansan nga agadaw kadagiti kasuratan, ibagana ti kababagasda, wenno iparipiripna dagita. (Mat. 4:3-10; 12:1-8; Luc. 10:25-28; 17:32) Idi umuna a siglo, kaaduanna adda kadagiti sinagoga dagiti lukot a naglaon iti Kasuratan. Awan ti pammaneknek nga addaan idi ni Jesus kadagita a lukot, ngem kabesadona unay dagiti Kasuratan ken masansan a tukoyenna dagita no isursurona dagiti sabsabali. (Luc. 24:27, 44-47) Sipupudno a makunana a saan a naggapu kenkuana ti insurona. Imbagana ti nangngegna ken Amana.​—Juan 8:26.

Kayattayo a suroten ti ulidan ni Jesus. Saantay a nangngeg a mismo a nagsao ti Dios, a kas pannakangngeg ni Jesus. Ngem ti Biblia ket Sao ti Dios. No usarentay dayta a pangibasaran kadagiti sungbattayo, maliklikantayo nga iturong ti atension iti bagbagitayo. Ipakitatayo nga imbes a sawentayo ti kapanunotan ti maysa nga imperpekto a tao, determinadotayo unay a mangipalubos a ti Dios ti mangibaga no ania ti pudno.​—Juan 7:18; Roma 3:4.

Siempre, saantay a basta usaren ti Biblia no di ket usarentay dayta a pakagunggonaan unay daydiay dumngeg kadatayo. Kayattayo nga isu ket agimdeng a buyogen ti silulukat nga isip. Depende iti panangmatmatna, mabalinmo nga iruangan dagiti kapanunotan nga adda iti Biblia babaen ti panangikunam iti kastoy: “Dika aya umanamong a ti napateg ket no ania ti kuna ti Dios?” Wenno mabalinmo nga ibaga: “Ammom kadi a sungbatan ti Biblia dayta a saludsod?” No ti kasarsaritam ket dina raemen ti Biblia, mabalin a baliwam ti introduksionmo. Mabalinmo a kunaen: “Kayatko nga iranud kenka daytoy nagkauna a padto.” Wenno mabalinmo nga ibaga: “Kastoy ti kuna ti libro a kasaknapan ti pannakaiwarasna iti pakasaritaan ti tao . . . ”

Iti dadduma a kasasaad, mabalin a kayatmo nga ibaga laeng ti kababagas ti maysa a teksto. Nupay kasta, no mabalbalin, kasayaatan no ukagem ti Biblia a mismo ket ibasam ti ibagbagana. No adda pannakabalinna, ipakitam kenkuana ti kasuratan iti mismo a Bibliana. Masansan a nabileg ti epektona kadagiti tattao ti kastoy a direkta a panangusar iti Biblia.​—Heb. 4:12.

Dagiti Kristiano a panglakayen nangnangruna a rebbeng nga usarenda ti Biblia no sungbatanda dagiti saludsod. Tapno kualipikado ti maysa a kabsat a lalaki nga agserbi kas panglakayen, masapul a ‘kumpet a sititibker iti matalek a sao no maipapan iti arte ti panangisurona.’ (Tito 1:9) Mabalin a mangaramid iti napateg a desision iti biagna ti maysa a kameng ti kongregasion kalpasan a binalakadan ti maysa a panglakayen. Anian a nagpateg a ti balakad ket sititibker a naibasar iti Kasuratan! No usaren ti maysa a panglakayen ti Kasuratan, mabalin a kasta met ti aramiden dagiti adu a dadduma pay no mangisursuroda.