Panagsao nga Addaan iti Kombiksion

NO AGSAO ti maysa a tao nga addaan iti kombiksion, makita dagiti sabsabali a talaga a patienna ti ibagbagana. Nabatad ti kasta a kombiksion iti ministerio ni apostol Pablo. Kadagidiay nagbalin a manamati idiay Tesalonica, insuratna: “Ti naimbag a damag nga ikaskasabami saan a dimteng kadakayo buyogen ti sasao laeng no di ket kasta met a buyogen ti . . . nabileg a panamati.” (1 Tes. 1:5) Naiparangarang ti kasta a kombiksion iti panagsasaona ken iti wagas ti panagbiagna. Maiparangarang met koma ti nabileg a kombiksion iti panangidatagtayo kadagiti kinapudno a linaon ti Biblia.

Ti panangyebkas iti kombiksion dina kaipapanan ti panagbalin a naakikid ti panagpampanunotna, dogmatiko, wenno arogante. Imbes ketdi, no ti maysa nga addaan iti kombiksion ket agsao maipapan kadagiti banag a linaon ti Sao ti Dios, agsao iti wagas a mangipakita iti nabileg a pammati.​—Heb. 11:1.

Dagiti Gundaway a Panangyebkas iti Kombiksion. Nasken nga agsaoka a buyogen ti kombiksion no addaka iti tay-ak ti ministerio. Masansan nga imutektekan dagiti tattao ti panagsasaom a kas iti panangimutektekda iti mensahem. Madlawda no kasano a talaga ti panagriknam iti ibagbagam. Ipamatmat ti kombiksionmo, a nabilbileg ngem babaen ti sasao laeng, nga adda nakapatpateg a banag nga iranudmo.

Nasken met ti panangyebkas iti kombiksion no dagiti kapammatiam ti palawagam. Insurat ni apostol Pedro ti umuna a naipaltiing a suratna ‘tapno mangipaay iti pammaregta ken napasnek a panangsaksi nga isu daytoy ti pudno a di kaikarian a kinamanangngaasi ti Dios.’ Iti daytoy a banag, indagadagna kadagiti kakabsat: “Agtakderkayo a sititibker.” (1 Ped. 5:12) Idi sinuratanna ti kongregasion idiay Roma, inyebkas ni apostol Pablo ti kombiksion a nakatulong kadakuada. Insuratna: “Kumbinsidoak nga uray ti ipapatay wenno ti biag wenno dagiti anghel wenno dagiti gobierno wenno ti bambanag nga addan wenno ti bambanag nga umayto wenno dagiti pannakabalin wenno ti kangato wenno ti kauneg wenno ti aniaman a sabali pay a parsua saandatayto a kabaelan nga isina iti ayat ti Dios nga adda ken Kristo Jesus nga Apotayo.” (Roma 8:38, 39) Makaguyugoy met ti insurat ni Pablo maipapan iti kinapateg ti panangasaba kadagiti sabsabali, ket ti mismo a kinaregtana iti dayta a trabaho nalawag a paneknekanna nga isu ket personal a kombinsido iti kinapateg dayta a trabaho. (Ara. 20:18-21; Roma 10:9, 13-15) Kasta met la a kombiksion ti rumbeng nga iparangarang dagiti Kristiano a panglakayen itatta no isuroda ti Sao ti Dios.

No tiempo ti panagadal ken iti dadduma pay a gundaway, masapul nga agsao dagiti nagannak nga addaan iti kombiksion no kasarsaritada dagiti annakda maipapan kadagiti naespirituan a banag. Kalikaguman daytoy a patanoren dagiti nagannak iti mismo a pusoda ti panagayat iti Dios ken iti daldalanna. Iti kasta mabalinda a kasarita dagiti annakda nga addaan iti naimpusuan a kombiksion, ‘ta manipud iti naruay iti puso agsao ti ngiwat.’ (Luc. 6:45; Deut. 6:5-7) Ti kaadda ti kasta a kombiksion gutugotenna met dagiti nagannak a mangipakita iti ulidan ti ‘pammati nga awanan panaginsisingpet.’​—2 Tim. 1:5.

Nangnangruna a nasken nga agsaoka nga addaan iti kombiksion no agsaludsod dagiti dadduma maipapan iti pammatim. Nalabit agsiddaaw ti kaeskuelaam, maestrom, wenno katrabahuam no apay a dika makiraman iti maysa a selebrasion. Ti natibker, nasayaat ti pannakailawlawagna a sungbat ti mabalin a tumulong kenkuana a mangraem iti naibasar iti Biblia a takdermo. No ngay allukoyendaka nga agaramid iti dakes​—panagkusit, panagdroga, wenno seksual nga imoralidad? Nasken nga ibatadmo nga uray kaano dimo maaramid dayta ket uray ania ti aramidenda a mangallukoy kenka, saanda a mapagbaw-ing ti panunotmo. Masapul nga ipatangkenmo a pagkedkedan ti tukonda. Idi sinaranget ni Jose ti pananggargari kenkuana ti asawa ni Potifar, sititibker a kinunana: “Kasano koma a maaramidko daytoy dakkel a kinadakes ket pudno nga agbasolak a maikaniwas iti Dios?” Idi saan a sardengan ti babai, nagtaray ni Jose a rimmuar iti balay.​—Gen. 39:9, 12.

No Kasano a Maiparangarang ti Kombiksion. Dakkel ti maaramidan ti sasao nga usarem a mangyebkas iti kombiksionmo. Iti adu a gundaway, inrugi ni Jesus dagiti napateg a sasaona babaen ti panagkunana: “Pudno unay kunak kenka.” (Juan 3:3, 5, 11; 5:19, 24, 25) Naiparangarang ti kombiksion ni Pablo kadagiti sasao a kas iti “Kumbinsidoak,” “Ammok ken maguyugoyak ken Apo Jesus,” ken “Ibagbagak ti kinapudno, saanak nga agul-ulbod.” (Roma 8:38; 14:14; 1 Tim. 2:7) Maipapan iti kaitungpalan ti saona, adda dagiti tiempo a pinaltiingan ni Jehova dagiti mammadtona a mangyebkas kadagiti naganetget a sasao kas iti “Di bumurong a pumudnonto.” (Hab. 2:3) No dakamatem dagitoy a padto, mabalinmo nga usaren dagiti umarngi a sasao. No saanka nga agtalek iti bagim no di ket ken ni Jehova ken no nadayaw ti pannakisaritam kadagiti sabsabali, dagiti sasaom a mangiparangarang iti umasping a kombiksion ti mangipakita nga addaanka iti nabileg a pammati.

Maipakita met ti kombiksion babaen ti kinapasnek ken puersa ti panagsaom. Dagiti ekspresion ti rupa, panagkompas, ken tigtignaymo ket makatulong iti daytoy, nupay mabalin a nagduduma dagita. Uray pay no managbabainka wenno naalumamay ti panagsasaom, maiparangarang ti kombiksionmo no naan-anay a mamatika a pudno ti ibagbagam ken masapul a mangngeg dayta dagiti dadduma.

Siempre, masapul a napudno ti panangyebkastayo iti kombiksion. No madlaw dagiti tattao nga aginkukunatayo imbes a naimpusuan ti panagsasaotayo, mabalin nga ipagarupda nga awan pategna ti mensahetayo. Ngarud, kangrunaan iti amin, agbalinka a natural. Depende iti kaadu dagiti agdengdengngeg kenka, mabalin a masapul a napigpigsa ti panagsaom ngem ti gagangay ken napuerpuersa. Ngem ikagumaam ti agsao a sipapasnek ken natural.

Dagiti Makatulong a Mangyebkas iti Kombiksion. Yantangay ti kombiksionmo ramanenna ti panangmatmatmo iti materialmo, nasken ti nasayaat a panagsagana. Saan nga umdas ti basta panangkopia iti material manipud iti publikasion ket kalpasanna ipalawagmo dayta. Masapul a matarusam a naimbag ti material ken kabaelam nga ilawlawag iti bukodmo a sasao. Masapul a naan-anay a kombinsidoka a pudno dayta ken napateg ti ibagbagam kadagiti agdengdengngeg. Kaipapanan daytoy a no isagsaganam ti palawagmo, ikonsiderarmo ti kasasaadda agraman ti datin nga ammoda maipapan iti topikom wenno no kasano ti panagriknada maipapan iti dayta.

Nalaklaka a madlaw dagiti dadduma ti kombiksiontayo no naannayas ti panagpalawagtayo. Gapuna, malaksid iti panangisaganam iti nasayaat a material, isaganam a naimbag ti panagpalawagmo. Ikkam iti naipangruna nga atension dagiti benneg ti materialmo a kasapulan ti ad-adda a kinapasnek tapno maipalawagmo dagita a dika unay agpannuray kadagiti notam. Laglagipem met ti dumawat iti pamendision ni Jehova iti panagreggetmo. Iti kasta, ‘makaurnongka iti tured babaen iti Diostayo’ nga agsao iti wagas a mangiparangarang iti kombiksionmo iti kinapudno ken kinapateg ti mensahem.​—1 Tes. 2:2.