Agtakderkayo a Naan-anay nga Addaan Natibker a Panamati

“Kankanayon nga umag-agawa iti karkararagna maigapu kadakayo, tapno iti kamaudiananna makapagtakderkayo a naan-anay ken addaan natibker a panamati iti amin a pagayatan ti Dios.”–COLOSAS 4:12.

1, 2. (a) Ania ti napaliiw dagiti dadduma maipapan kadagiti nagkauna a Kristiano? (b) Kasano nga iyanninaw ti libro a Colosas ti naayat a pannakaseknan?

MASEKNAN unay idi dagiti pasurot ni Jesus kadagiti padada a managdaydayaw. Dinakamat ni Tertullian (mannurat idi maikadua ken maikatlo a siglo K.P.) ti kinaimbag nga impakitada kadagiti ulila, napanglaw, ken nataengan. Dagita nga ebkas ti ayat ti namagsiddaaw kadagiti di manamati nga uray la kinuna ti dadduma maipapan kadagiti Kristiano, ‘Kitaenyo no kasano ti panagiinnayatda.’

² Iyanninaw ti libro a Colosas ti kasta a naayat a pannakaseknan da apostol Pablo ken ti kaduana a ni Epafras kadagiti kakabsat idiay Colosas. Iti suratna kadakuada, kinuna ni Pablo: “Kankanayon nga umag-agawa [ni Epafras] iti karkararagna maigapu kadakayo, tapno iti kamaudiananna makapagtakderkayo a naan-anay ken addaan natibker a panamati iti amin a pagayatan ti Dios.” Dagita a sasao ti Colosas 4:12 ti teksto dagiti Saksi ni Jehova iti tawen 2001: ‘Agtakderkayo a naan-anay ken addaan natibker a panamati iti amin a pagayatan ti Dios.’

3. Ania a dua a banag ti inkararag ni Epafras?

³ Imutektekanyo ta iti panangikararag ni Epafras kadagiti patpatgenna, adda dua a banag a dinakamatna: (1) ‘iti kamaudiananna makapagtakderda a naan-anay’ ken (2) makapagtakderda nga “addaan natibker a panamati iti amin a pagayatan ti Dios.” Nairaman daytoy nga impormasion iti Kasuratan tapno pakagunggonaantayo. Isu nga iyimtuodyo iti bagiyo, ‘Ania ti nasken nga aramidek tapno iti kamaudiananna makapagtakderak a naan-anay nga addaan natibker a panamati iti amin a pagayatan ti Dios? Ket no aramidek dayta, ania ngata ti epektona?’ Kitaentayo.

Ikagumaanyo ti ‘Agtakder a Naan-anay’

4. Iti ania nga anag a nasken nga agbalin a “naan-anay” dagiti taga Colosas?

⁴ Tarigagayan unay idi ni Epafras nga ‘iti kamaudiananna makapagtakder koma a naan-anay’ dagiti naespirituan a kakabsatna idiay Colosas. Awan pagkuranganna, natangkenan, wenno nataengan ti mabalin nga anag ti termino nga inaramat ni Pablo, a naipatarus ditoy a “naan-anay.” (Mateo 19:21; Hebreo 5:14; Santiago 1:4, 25) Nalabit ammoyo a nupay nagbalinen a bautisado a Saksi ni Jehova ti maysa a tao, dina kayat a sawen nga isu ket nataenganen a Kristiano. Iti surat ni Pablo kadagiti taga Efeso, nga agnanaed iti lauden ti Colosas, kinunana nga adda dagiti papastor ken mannursuro a mangikagkagumaan a tumulong ‘iti amin a makagteng iti panagmaymaysa iti pammati ken iti umiso a pannakaammo iti Anak ti Dios, iti maysa a nataenganen a tao, iti rukod ti kinatayag ti kinanaan-anay ti Kristo.’ Iti sabali pay a suratna, indagadag ni Pablo kadagiti Kristiano nga agbalinda a “nataenganen iti pannakabalin ti pannakaawat.”​—Efeso 4:8-13; 1 Corinto 14:20.

5. Kasanotay a mapagbalin a napateg a kalat ti panagbalin a naan-anay?

⁵ No saan pay idi a natangkenan wenno nataengan iti naespirituan ti dadduma kadagiti taga Colosas, nasken a ragpatenda dayta. Saan kadi a rumbeng a kasta met ita? Pinullo man a tawenen ti napalabas manipud idi nabautisarantayo wenno nabiit pay, makitatayo kadi a nalawag a simmayaaten ti panagrasrason ken panangmatmattayo? Us-usigentay kadi dagiti prinsipio ti Biblia sakbay nga agdesisiontayo? Dagiti kadi banag a mainaig iti Dios ken kadagiti pagsayaatan ti kongregasion ti kangrunaan iti biagtayo, imbes a maikadua laeng? Ditay madakamat ditoy ti amin a pamay-an no kasanotay a mayanninaw ti kasta nga irarang-ay nga agturong iti kinanaan-anay, ngem usigentayo ti dua nga ehemplo.

6. Ania ti mabalin a parang-ayen ti maysa tapno agbalin a naan-anay, kas ken Jehova?

⁶ Umuna nga ehemplo: Ipapantayon a dimmakkeltayo iti lugar a mairurrurumen wenno mabusbusor dagiti tattao a sabali ti puli, nasionalidad, wenno rehion a naggapuanda. Ammotay itan a saan a mangidumduma ti Dios ket kastatay met koma. (Aramid 10:14, 15, 34, 35) Iti kongregasion wenno sirkitotayo, adda dagidiay saantay a kapuli, kailian, wenno karehionan, ket kapulpulapoltay ida. Kaskasdi, negatibo kadi ti panangmatmattayo kadakuada wenno pagduaduaantay ida? Umingartay kadi a dagus no nagbiddut wenno nasairdatay la bassit ket dakesen ti pangipagarupantayo kadakuada? Saludsodanyo ti bagiyo, ‘Kasapulan kadi a rumang-ayak pay tapno mayanninawko ti di mangidumduma a panangmatmat ti Dios?’

7. Ti panagbalin a naan-anay kas Kristiano kaipapananna ti pannakaadda iti ania a panangmatmat kadagiti dadduma?

⁷ Maikadua nga ehemplo: Sigun iti Filipos 2:3, ‘awan koma ti aniaman nga aramidentayo gapu iti kinamannakirupir wenno gapu iti panangipasindayaw iti bagi, no di ket buyogen ti kinapakumbaba iti isip nga ibilangtayo a dagiti dadduma nangatngatoda.’ Rumangrang-aytayo kadi iti daytoy a banag? Adda pagkapuyan ken paglaingan ti tunggal maysa. No alistotay idi a mangdillaw iti pagkapuyan ti dadduma, rimmang-aytay kadin, a saantay a namnamaenen kadakuada ti gistay ‘kinaperpekto’? (Santiago 3:2) Ad-adda kadi itan a makitatayo​—sapsapulentay pay ketdi​—dagiti pangatiwan dagiti dadduma? ‘Bigbigek a naan-anus daytoy a kabsat ngem siak.’ ‘Napigpigsa ti pammati dayta a tao.’ ‘Kinapudnona, nalalaing a mangisuro ngem siak.’ ‘Nalalaing a mangmedmed iti pungtotna dayta a tao.’ Nalabit kasapulan idi a rumang-ay dagiti taga Colosas iti daytoy a banag. Datayo ngay?

8, 9. (a) Iti ania nga anag nga inkararagan ni Epafras dagiti taga Colosas a ‘makapagtakderda’ koma a naan-anay? (b) Maipanggep iti masanguanan, ania ti ipasimudaag ti ‘panagtakder a naan-anay’?

⁸ Inkararag ni Epafras a ‘makapagtakder koma a naan-anay’ dagiti taga Colosas. Nalawag nga inkararag ni Epafras iti Dios nga aniaman ti rinang-ayan dagiti taga Colosas nga agturong iti panagbalin a naan-anay, nataengan, natangkenan a Kristiano, ‘makapagtakderda’ koma, wenno makapagtalinaedda a kasta.

⁹ Ditay maibaga a tunggal maysa a nagbalin a Kristiano, uray no nataenganen, ket agtalinaed a kasta. Kinuna ni Jesus nga adda maysa nga anghel nga anak ti Dios a “saan a nagtakder a di maisin iti kinapudno.” (Juan 8:44) Ken pinalagipan ni Pablo dagiti taga Corinto maipapan iti sumagmamano a tattao iti napalabas a nagserbi ken Jehova ngem saanda a nagtultuloy. Binallaaganna dagiti kakabsat a napulotan iti espiritu: “Ti mangipagarup nga isu sitatakder agannad koma tapno di maikulbo.” (1 Corinto 10:12) Mangpatalged daytoy iti kararag nga ‘iti kamaudiananna makapagtakder koma a naan-anay’ dagiti taga Colosas. No nagbalindan a naan-anay, nataengan, nasken nga agtultuloyda a kasta, a saanda nga agsanud, kumapuy, wenno mayaw-awan. (Hebreo 2:1; 3:12; 6:6; 10:39; 12:25) Iti kasta, ‘naan-anaydanto’ iti aldaw ti pannakasukimat ken ultimo a pannakaanamongda.​—2 Corinto 5:10; 1 Pedro 2:12.

10, 11. (a) Ania a padron ti impaay kadatayo ni Epafras no maipapan iti kararag? (b) Maitunos iti inaramid ni Epafras, ania ti ikagumaanyo nga aramiden?

¹⁰ Nausigtayon ti kinapateg ti panangdakamat iti nagan dagiti dadduma no ikararagantay ida, nga espesipiko nga idawattayo ken Jehova a tulongan, liwliwaen, bendisionan, ken ikkanna ida iti nasantuan nga espiritu. Kasta ti panangikararag ni Epafras kadagiti taga Colosas. Ken makasaraktayo​—kinapudnona rumbeng a mangsaraktayo​—kadagita a sasao iti napateg a singasing no ania ti ikararagtayo ken Jehova maipapan iti bagbagitayo. Di pagduaduaan a rumbeng a dumawattayo iti tulong ni Jehova tapno ‘iti kamaudiananna makapagtakderto a naan-anay’ ti tunggal maysa kadatayo. Ar-aramidenyo kadi dayta?

¹¹ Iti kararagyo, apay a diyo dakamaten ti kasasaadyo? Makisaritakayo iti Dios maipapan iti rinang-ayanyo nga agturong iti panagbalin a “naan-anay,” natangkenan, nataengan. Iyararawyo a tulongannakayo a mangbigbig no ania pay ti nasken a parang-ayenyo iti naespirituan. (Salmo 17:3; 139:23, 24) Sigurado nga adda dagiti mabalinyo a parang-ayen. Imbes ngarud a maupaykayo gapu iti daytoy, silalawag ken sipaprangka nga idawatyo iti Dios a tulongannakayo a rumang-ay. Saan la a maminsan nga aramidenyo daytoy. Kinapudnona, apay a diyo ikeddeng nga iti umay a lawas ipapautyo ti agkararag tapno ‘iti kamaudiananna makapagtakderkayo koma a naan-anay’? Ken iplanoyo nga aramiden dayta a masansan bayat a sipapanunotkayo iti teksto iti tawen. Kadagiti kararagyo, ipamaysayo iti aniaman a pagannayasanyo nga agsanud, kumapsut, wenno umikay iti panagserbi iti Dios ken no kasanoyo a maliklikan dayta.​—Efeso 6:11, 13, 14, 18.

Ikararagyo a Maaddaankay Koma iti Natibker a Panamati

12. Apay a kasapulan unay idi dagiti taga Colosas ti “natibker a panamati”?

¹² Adda pay maysa a napateg nga inkararag ni Epafras tapno maaddaan dagiti taga Colosas iti kamaudiananna iti naanamongan a takder iti imatang ti Dios. Nasken met dayta kadatayo. Ania ngay dayta? Inkararagna a makapagtakderda koma nga “addaan natibker a panamati iti amin a pagayatan ti Dios.” Nalikmutda idi kadagiti di umiso a sursuro ken makadadael a pilosopia, a ti dadduma kadagita ket kasla paset ti pudno a panagdayaw. Kas pagarigan, adda idi dagiti mangpilit kadakuada a ngilinenda dagiti naisangsangayan nga aldaw babaen ti panagayunar wenno panagpiesta, kas maiparebbeng idi iti panagdayaw dagiti Judio. Dagiti saan a pudno a mannursuro itan-okda dagiti anghel, dagiti mannakabalin nga espiritu a nausar a mangted iti Linteg ken Moises. Panunotenyo laengen no dakayo ti adda iti kakasta a kasasaad! Nakaad-adu dagiti agsisimparat a kapanunotan.​—Galacia 3:19; Colosas 2:8, 16-18.

13. Tapno matulongan dagiti taga Colosas, ania ti nasken a maawatanda, ket kasano a matulongannatay dayta?

¹³ Sinupiat ni Pablo dagita a kapanunotan babaen ti panangipaganetgetna iti akem ni Jesu-Kristo. “Idinto ta inawatyo ni Kristo Jesus nga Apo, itultuloyyo ti magna a maikaykaysa kenkuana, a naparamut ken napadakkel kenkuana ken napatibker iti pammati, a kas iti pannakaisuroyo.” Wen, masapul a naan-anay ti pammati (dagiti taga Colosas ken uray datayo) iti akem ni Kristo iti panggep ti Dios ken iti biagtayo. Inlawlawag ni Pablo: “Kenkuana a ti amin a kinanaan-anay ti nadibinuan a kababalin agtaeng a sibubukel. Ket iti kasta maikutankayo iti kinanaan-anay babaen kenkuana, nga isu ti ulo ti amin a gobierno ken turturay.”​—Colosas 2:6-10.

14. Apay a ti namnama ket napaypayso kadagiti taga Colosas?

¹⁴ Napulotan iti espiritu dagiti Kristiano idiay Colosas. Naisangsangayan ti namnamada, biag idiay langit, ket adda nasayaat a rason a pagtalinaedenda a naraniag dayta a namnama. (Colosas 1:5) “Pagayatan ti Dios” a naan-anay nga agtalekda iti kinatalged ti namnamada. Rumbeng kadi a pagduaduaan ti asinoman kadakuada dayta a namnama? Saan! Adda met kadi rason nga agduadua dagiti amin nga addaan iti inted-Dios a namnama nga agbiag iti paraiso a daga? Awan! Dayta a natalged a namnama ket nalawag a paset ti “pagayatan ti Dios.” Ita, usigenyo dagitoy a saludsod: No ikagkagumaanyo ti agbalin a paset ti “dakkel a bunggoy” a makalasatto iti “dakkel a rigat,” kasano kaagpayso ti namnamayo? (Apocalipsis 7:9, 14) Paset kadi dayta ti “natibker a panamatitayo iti amin a pagayatan ti Dios”?

15. Ania ti nagsasaganad a dinakamat ni Pablo a pakairamanan ti namnama?

¹⁵ Ti “namnama” dina kaipapanan ti sinsinan a kalikagum wenno arapaap. Maawatantayo daytoy iti agsasaruno a punto nga indatag ni Pablo kadagiti taga Roma. Kadagita a punto, ti tunggal banag a nadakamat ket mainaig wenno mangiturong iti sumaruno. Imutektekanyo no nangiserrekan ni Pablo iti “namnama” iti panagrasrasonna: “Agrag-otayo unay bayat nga addatayo kadagiti rigat, yantangay ammotayo a ti rigat pataudenna ti panagibtur; ti panagibtur, kalpasanna, maysa a naanamongan a kasasaad; ti naanamongan a kasasaad, kalpasanna, namnama, ket ti namnama di mangiturong iti pannakaupay; agsipud ta ti ayat ti Dios naiparukpok iti puspusotayo babaen ti nasantuan nga espiritu.”​—Roma 5:3-5.

16. Idi naammuanyo ti kinapudno a linaon ti Biblia, ania a namnama ti nagun-odyo?

¹⁶ Idi damo nga indanon kadakayo dagiti Saksi ni Jehova ti mensahe ti Biblia, mabalin nga adda partikular a kinapudno a nangala iti atensionyo, kas ti kasasaad dagiti natay wenno ti panagungar. Para iti adu, ti kangrunaan a damdamoda a naammuan ket isu ti naibatay-Biblia a namnama a panagbiag iti paraiso a daga. Lagipenyo daydi damo a pannakangngegyo iti dayta a sursuro. Anian a nagsayaat a namnama​—awanton ti sakit ken panaglakay, mabalinyo ti agbiag nga agnanayon tapno matagiragsakyo ti nagbannoganyo, ken saanton a mangranggas dagiti animal! (Eclesiastes 9:5, 10; Isaias 65:17-25; Juan 5:28, 29; Apocalipsis 21:3, 4) Naaddaankayo iti naisangsangayan a namnama!

17, 18. (a) Kasano a nangiturong iti namnama dagiti agsasaruno a punto nga indatag ni Pablo kadagiti taga Roma? (b) Ania a namnama ti kayat a sawen ti Roma 5:4, 5, ket addaankay kadi iti kasta a namnama?

¹⁷ Idi agangay, mabalin a binusor wenno indadanesdakayo. (Mateo 10:34-39; 24:9) Uray kadagiti kallabes a tiempo, natakawan ti balbalay dagiti Saksi iti nadumaduma a pagilian wenno napilitanda a nagbakuit. Dadduma ti naranggasan, nakompiskar dagiti Biblikal a literaturada, wenno naparpardayada kadagiti padamag iti media. Aniaman a kita ti pannakaidadanes ti mabalin a pakaipasanguanyo, kas kuna ti Roma 5:3, makapagrag-okayo iti baet ti rigat a napasaranyo, ket nasayaat ti resultana. Kas insurat ni Pablo, ti rigat sinursuruannakayo nga agibtur. Ket gapu iti panagibturyo, naaddaankayo iti naanamongan a takder. Ammoyo nga umiso ti inaramidyo, a tinungpalyo ti pagayatan ti Dios, isu a masiguradoyo nga adda kadakayo ti paborna. Kas kinuna ni Pablo, nariknayo nga addaankayo iti “naanamongan a kasasaad.” Iti panangituloyna, insurat ni Pablo a ti ‘naanamongan a kasasaad [pataudenna] ti namnama.’ Kasla karkarna dayta. Apay nga inyud-udi ni Pablo ti “namnama”? Saan kadi a nabayagen nga adda namnamayo, idi damo a nangngegyo ti naimbag a damag?

¹⁸ Nalawag a saan a tuktukoyen ditoy ni Pablo ti damo a pannakaadda ti namnamayo iti perpekto a biag. Saan la a dayta ti tuktukoyenna; naun-uneg daytoy, ad-adda a makagutugot. No agibturtayo a simamatalek ket iti kasta ammotayo a maay-ayo ti Dios, dakkel ti epekto daytoy ta nayonan ken patibkerenna ti namnamatayo idi damo. Ti namnamatayo ket ad-addan a napaypayso, nataltalged, ken mas personal. Naranraniag daytoy natibker a namnama. Impluensiaanna ti biagtayo, ti kaunggantayo. “Ket ti namnama di mangiturong iti pannakaupay; agsipud ta ti ayat ti Dios naiparukpok iti puspusotayo babaen ti nasantuan nga espiritu.”

19. Kasanoyo nga iraman ti namnamayo iti kararagyo iti inaldaw?

¹⁹ Sipapasnek nga inkararag ni Epafras a dagiti kakabsatna idiay Colosas agtultuloyda a matignay ken kombinsidoda koma iti agur-uray kadakuada, nga addaanda iti “natibker a panamati iti amin a pagayatan ti Dios.” Masansan met koma a dakamatentayo iti Dios ti namnamatayo. Kadagiti personal a kararagyo, iramanyo ti namnamayo maipanggep iti baro a lubong. Iyebkasyo ken Jehova no kasano ti panangiliwyo iti dayta, a naan-anay nga agtalekkayo a dumtengto dayta. Iyararawyo a tulongannakayo a mangpauneg ken mangpatibker iti pammatiyo. Kas iti panangikararag ni Epafras a dagiti taga Colosas maaddaanda koma iti “natibker a panamati iti amin a pagayatan ti Dios,” kasta met ti aramidenyo. Sansanenyo nga ikararag dayta.

20. No sumiasi ti sumagmamano iti Nakristianuan a dalan, apay a di rumbeng a maupaykayo?

²⁰ Dikay koma mariribukan wenno maupay no adda dagidiay saan a makapagtakder a naan-anay ken awanan iti natibker a pammati. Mabalin a mapaay, umikay, wenno sumuko ti dadduma. Napasamak dayta kadagiti kasisingedan a kakadua ni Jesus, dagiti apostolna. Ngem idi nagtraidor ni Judas, gimminad wenno simmardeng kadi dagiti dadduma nga apostol? Saan! Inadaw ni Pedro ti Salmo 109:8 tapno ipakitana nga adda sabali a mangala iti akem ni Judas. Nangpilida iti kasukatna, ket dagiti nasungdo iti Dios intultuloyda ti nangasaba. (Aramid 1:15-26) Determinadoda nga agtakder a naan-anay nga addaan natibker a panamati.

21, 22. Kasano a mapaliiw ti panagtakderyo a naan-anay nga addaan natibker a panamati?

²¹ Masiguradoyo met a saan a mayaleng-aleng ti panagtakderyo a naan-anay nga addaan natibker a panamati iti amin a pagayatan ti Dios. Adda dagiti makapaliiw ken mangapresiar iti dayta. Siasino?

²² Bueno, mapaliiwdakayo dagiti kakabsat a makaam-ammo ken mangipatpateg kadakayo. Nupay saan nga iyebkas ti kaaduan, kasda man la ibagbaga ti mabasatayo iti 1 Tesalonica 1:2-6: “Kankanayon nga agyamankami iti Dios no dakamatenmi ti maipapan kadakayo amin kadagiti kararagmi, ta laglagipenmi a di agressat ti matalek nga aramidyo ken ti naayat a panagbannogyo ken ti panagibturyo gapu iti namnamayo ken Apotayo a Jesu-Kristo iti sanguanan ti Dios ken Amatayo. Ta . . . ti naimbag a damag nga ikaskasabami saan a dimteng kadakayo buyogen ti sasao laeng no di ket kasta met a buyogen ti pannakabalin ken buyogen ti nasantuan nga espiritu ken nabileg a panamati . . . ; ket nagbalinkayo a tumutulad kadakami ken iti Apo.” Kasta met laeng ti panagrikna dagiti nasungdo a Kristiano nga adda iti aglawlawyo no makitada nga ‘agtaktakderkayo a naan-anay ken addaan natibker a panamati iti amin a pagayatan ti Dios.’​—Colosas 1:23.

23. Iti umay a tawen, ania koma ti determinasionyo?

²³ Di pagduaduaan nga agpalpaliiw ken maragsakan ti nailangitan nga Amayo. Masiguradoyo dayta. Apay? Agsipud ta agtaktakderkayo a naan-anay ken addaan natibker a panamati “iti amin a pagayatan ti Dios.” Iti surat ni Pablo kadagiti taga Colosas, pinaregtana ida a magna a “maikari ken Jehova maipaay iti panggep a panangay-ayo a naan-anay kenkuana.” (Colosas 1:10) Wen, kabaelan dagiti imperpekto a tattao nga ay-aywen a naan-anay ni Jehova. Naaramidan dayta dagiti kakabsatyo a taga Colosas. Kasta ti ar-aramiden ita dagiti Kristiano nga adda iti aglawlawyo. Maaramidyo met dayta! Gapuna, iti daytoy sumaganad a tawen, paneknekan koma dagiti kararag ken aramidyo iti inaldaw a determinadokayo nga ‘iti kamaudiananna makapagtakder a naan-anay ken addaan natibker a panamati iti amin a pagayatan ti Dios.’

Malagipyo Kadi?

• Ania ti nairaman iti ‘panagtakderyo a naan-anay’?

• Ania a bambanag maipapan iti bagiyo ti mairaman koma iti kararagyo?

• Kas ipasimudaag ti Roma 5:4, 5, ania a namnama ti kayatyo a magun-od?

• Ti panagadaltayo ginutugotnakayo a maaddaan iti ania a kalat iti daytoy a tawen?

[Ladawan iti panid 20]

Inkararag ni Epafras nga agtalinaed koma dagiti kakabsatna kas natataengan a Kristiano, nga addaan natibker a panamati ken ni Kristo ken iti namnamada

[Dagiti Ladawan iti panid 23]

Minilion dagiti padayo nga addaan natalged a namnama ken natibker a panamati