Epektibo a Konklusion

MABALIN a siaannad a sinukimat ken inorganisarmo ti material nga usarem iti palawagmo. Nalabit nangisaganaka met iti makatukay-interes nga introduksion. Ngem adda pay maysa a kasapulam​—ti epektibo a konklusion. Saanmo a tagibassiten ti pateg ti konklusion. Ti maudi nga ibagam ti masansan nga agpaut iti panunot dagiti agdengngeg. No nakapuy ti konklusion, mabalin a maksayan ti pateg ti immun-una nga imbagam.

Usigem ti sumaganad: Idi dandanin agngudo ti biagna, nangipaay ni Josue iti nakallalagip a diskurso kadagiti panglakayen ti nasion ti Israel. Kalpasan ti panangisalaysayna iti pannakilangen ni Jehova iti Israel manipud pay idi kaaldawan ni Abraham, inulit laeng aya ni Josue nga intampok dagita babaen ti pananggupgopna? Saan. Imbes ketdi, sipapasnek nga indagadagna kadagiti umili: “Agbutengkayo ken Jehova ket agserbikayo kenkuana iti kinaawan pagkurangan ken iti kinapudno.” Basaem a mismo ti konklusion ni Josue, a nailanad iti Josue 24:14, 15.

Ti sabali pay a naisangsangayan a palawag, a masarakan iti Aramid 2:14-36, ket impaay ni apostol Pedro kadagiti umariwekwek a tattao sadi Jerusalem iti Piesta ti Pentecostes idi 33 K.P. Inlawlawagna nga umuna a maim-imatanganda ti kaitungpalan ti padto ni Joel maipapan iti pannakaiparukpok ti espiritu ti Dios. Sumaganad, impakitana no kasano a nainaig daytoy kadagiti padto maipapan iti Mesias a nailanad kadagiti Salmo a nangipakpakauna iti panagungar ni Jesu-Kristo ken iti pannakaitan-okna iti makannawan ti Dios. Kalpasanna, iti konklusionna, imbatad ni Pedro ti isyu a masapul a sanguen dagiti amin nga agdengdengngeg kenkuana. Kinunana: “Gapuna ammuen koma ti intero a balay ti Israel nga awan duadua a ti Dios pinagbalinna nga agpadpada nga Apo ken Kristo, daytoy Jesus nga inlansayo.” Inimtuod dagiti adda sadiay: “Lallaki, kakabsat, ania ti aramidenmi?” Insungbat ni Pedro: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo.” (Ara. 2:37, 38) Iti dayta nga aldaw, agarup 3,000 kadagiti tattao nga adda sadiay ti nagutugot iti kasta unay gapu iti nangngegda ket inawatda ti kinapudno maipapan ken Jesu-Kristo.

Dagiti Punto a Laglagipen. Masapul a ti ibagam iti konklusionmo ket direkta a nainaig iti tema ti palawagmo. Agserbi koma dayta a kas lohikal a konklusion kadagiti kangrunaan a punto nga impalawagmo. Nupay mabalin a kayatmo nga iraman ti sumagmamano a kangrunaan a sasao a nausar iti temam, saan nga inkapilitan nga ulitem dagita a sao-por-sao.

Kadawyanna, ti panggepmo nga agpalawag ket tapno maparegtam dagiti sabsabali nga agtignay a maitunos iti impormasion nga idatagmo. Maysa kadagiti kangrunaan a panggep ti konklusion ti panangipakitam kadakuada no ania ti aramidenda. Idi pinilim ti temam ken dagiti kangrunaan a puntom, inamirismo met la aya a naimbag no apay a napateg ti material kadagiti agdengngeg ken no ania ti panggepmo a mangipalawag iti dayta? No kasta, ammom ti kayatmo nga aramidenda. Ita, nasken nga ilawlawagmo no ania ti rumbeng nga aramidenda ken nalabit no kasanoda nga aramiden.

Malaksid iti panangipakitam kadagiti agdengdengngeg no ania ti aramidenda, ti konklusionmo gutugotenna koma ida nga agtignay. Rumbeng a ramanen dayta dagiti nainkalintegan a rason no apay nga agtignayda ken nalabit dagiti pagimbagan ti panangaramidda iti dayta. No pinanunotmo a naimbag ken nasayaat ti pannakayablat ti maudi a sasaom, ad-adda nga epektibo ti intero a palawagmo.

Laglagipem nga aglepleppasen ti palawagmo. Ti ibagbagam ti mangipasimudaag koma iti dayta. Maitutop met koma ti kapartak ti panagsaom. Dimo partakan ti agsao agingga iti ngudo ket kalpasanna bigla a sumardengka. Iti sabali a bangir, saan koma a basta agin-inut a kumapsut ti bosesmo. Umdas koma ti kapigsa ti timekmo ngem saan a nalabes. Malasin koma nga aggibusen ti palawagmo bayat nga ibagbagam dagiti maudi a sasaom. Rumbeng a napasnek ken addaan kombiksion ti panangyibbetmo kadagita a sasao. No isagsaganam ti palawagmo, dimo liplipatan nga ensayuen ti konklusionmo.

Kasano ti kaatiddog ti konklusion? Saan laeng a ti oras ti mangikeddeng iti dayta. Saan koma a maapura ti konklusion. Maikeddeng ti mayanatup a kaatiddogna babaen ti epektona kadagiti agdengdengngeg. Apresiaren dagiti agdengdengngeg ti simple, direkta, ken positibo a konklusion. Epektibo met ti at-atiddog bassit a konklusion nga addaan iti ababa nga ilustrasion no dayta ket naiplano a naimbag. Pagdiligem ti ababa a konklusion ti intero a libro ti Eclesiastes, a masarakan iti Eclesiastes 12:13, 14, ken ti ab-ababa nga amang a konklusion ti Sermon iti Bantay, a nailanad iti Mateo 7:24-27.

Iti Tay-ak ti Ministerio. Iti tay-ak ti ministerio, ad-adda a masansan a kasapulam ti konklusion. No agsaganaka ken addaanka iti naayat a pannakaseknan kadagiti tattao, adu ti nasayaat a magapuanam. Makatulong ti balakad a naipaay kadagiti immun-una a panid uray no duakay laeng iti bumalay nga agsarsarita.

Mabalin nga ababa unay ti panagsaritayo. Nalabit okupado ti bumalay. Mabalin a maysa la a minuto ti panagsaritayo. No maitutop, mabalin a kastoy ti ibagam: “Makitak nga okupadokayo. Ngem palubosandak koma a mangibati kadakayo iti makaparegta a kapanunotan. Ipakita ti Biblia nga adda nagsayaat a panggep ti Namarsua kadatayo​—pagbalinenna ti daga a maysa a disso nga iti dayta matagiragsak dagiti tattao ti biag nga agnanayon. Mabalin nga addatayto iti dayta a Paraiso, ngem masapul nga ammuentayo dagiti kalikaguman ti Dios.” Wenno mabalin nga ibagam laeng a baliwamto ti sumarungkar iti tiempo a kombiniente kenkuana.

No maguped ti pannakisaritam gapu ta bigla a bumallaet ti bumalay​—nasabrak pay ketdi​—adu latta ti nasayaat a maaramidam. Laglagipem ti balakad a masarakan iti Mateo 10:12, 13 ken Roma 12:17, 18. No naalumamay ti sungbatmo, mabalin nga agbaliw ti panangmatmatna kadagiti Saksi ni Jehova. Nasayaat a gapuanan dayta.

Iti sabali a bangir, mabalin a naragsak ti panagsaritayo iti bumalay. Apay a dimo uliten nga ibaga ti kangrunaan a punto a kayatmo a laglagipenna? Gutugotem nga agtignay a maitunos iti dayta.

No makitam a mabalinyo ti agsaritanto manen iti sabali a gundaway, ikkam ti bumalay iti panggapuanna a mangsegga iti dayta. Mangibangonka iti saludsod​—nalabit maysa a saludsod a nasalaysay iti Panakirinnason Manipud Kadagiti Kasuratan wenno iti publikasion a maus-usar iti panagadal iti Biblia iti pagtaengan. Laglagipem ti panggepmo, kas intuyang ni Jesus ken nailanad iti Mateo 28:19, 20.

Ingudngudomon aya ti panagadalyo iti Biblia iti pagtaengan? No ulitem nga ibaga ti tema, matulongam ti iyad-adalam a manglagip iti inadalyo. No agusarka kadagiti pangrepaso a saludsod, matulongam ti iyad-adalam a mangimula kadagiti kangrunaan a punto iti panunotna, nangruna no saanmo a dardarasen ti kasta a panagrepaso. No saludsodem ti iyad-adalam no kasano a magunggonaan iti nasursurona wenno no kasano a mairanudna dayta kadagiti sabsabali, mabalin a makatulong dayta kenkuana a mangutob no kasano a mayaplikarna ti naadalna iti praktikal a pamay-an.​—Prov. 4:7.

Laglagipem​—ti konklusionmo impluensiaanna ti kinaepektibo ti amin a napagsaritaanyo.