Nasayaat nga Ulidan​—Ni Asaf

Agpaspasar ni Asaf iti narigat a panawen iti biagna. Makitkitana dagiti tattao iti aglawlawna a mangsalsalungasing kadagiti linteg ti Dios ngem kasla nagsayaat met ti biagda! Kas resultana, pampanunoten ni Asaf no adda met laeng serbina ti panangikagumaan a mangay-ayo iti Dios. “Sigurado a kinaubbaw ti panangdalusko iti pusok ken ti panangbuggok kadagiti imak iti mismo a kinaawan basol,” kinunana. Ngem nagbalbaliw ti panunot ni Asaf idi tiningitingna a naimbag ti bambanag. Naamirisna a temporario laeng ti ragsak a marikrikna dagiti nadangkes. Ania ti konklusion ni Asaf? Inkantana ken Jehova: “Malaksid kenka awanen ti sabali pay a pakaragsakak iti daga.”​—Salmo 73:3, 13, 16, 25, 27.

Nalabit kueskuestionaram no dadduma ti kinapateg ti panagbiag a mayannurot kadagiti pagalagadan ti Dios. Ngem tuladem ni Asaf ket tingitingem a naimbag ti kasasaad. Panunotem ti kasasaad dagidiay nangsalungasing kadagiti linteg ni Jehova. Talaga kadi nga addaanda iti talna? Adda kadi natakuatanda a sekreto ti kinaragsak nga awan kadagidiay matalek iti Dios? Kalpasan a mautobmo a naimbag ti bambanag, awan duadua a maikunam met ti imbaga ni Asaf: “Ti iyaadani iti Dios naimbag kaniak.”​—Salmo 73:28.