“Laglagipenyo Dagidiay Mangidadaulo Kadakayo”

DAGITOY a sasao ni apostol Pablo a nairekord iti Hebreo 13:7 ket maipatarus met kas: “Laglagipenyo dagiti gobernadoryo.” Sipud idi Pentecostes 33 C.E., dagiti matalek nga apostol ni Apo Jesu-Kristo ti nagakem kas bagi a manarawidwid a nangidaulo ken nangiwanwan iti kabbuangay a kongregasion Kristiano. (Ara. 6:2-4) Idi agarup tawen 49 C.E., immadu ti kameng ti bagi a manarawidwid ta saan laengen a dagiti apostol ni Jesus ti mangbukel iti daytoy. Idi nadesisionan ti isyu maipapan iti panagkugit, dayta a bagi ket buklen dagiti “apostol ken panglakayen idiay Jerusalem.” (Ara. 15:1, 2) Responsabilidadda nga usigen ti bambanag a mangapektar kadagiti Kristiano iti sadinoman a lugar. Nangipatulodda kadagiti surat ken bilin a nangpabileg kadagiti kongregasion tapno mataginayon ti panagkaykaysa iti panunot ken aramid dagiti adalan. Nagtulnog ken nagpasakup dagiti kongregasion iti bilin ti bagi a manarawidwid, ket kas resultana, binendisionan ida ni Jehova ken rimmang-ayda.​—Ara. 8:1, 14, 15; 15:22-31; 16:4, 5; Heb. 13:17.

² Idi natay dagiti apostol, nangrugi ti nakaro nga apostasia. (2 Tes. 2:3-12) Kas impadto ni Jesus iti pangngarigna maipapan iti trigo ken dakes a ruot, ti talon a namulaan iti trigo (dagiti napulotan a Kristiano) ket mamulaan met kadagiti dakes a ruot (dagiti sinsinan Kristiano). Iti naglabas a siglo, napalubosanda nga aggiddan a dumakkel agingga iti panagani, ti “panungpalan daytoy a sistema ti bambanag.” (Mat. 13:24-30, 36-43) Iti daytoy a tiempo, nagtultuloy nga inanamongan ni Jesus dagiti indibidual a napulotan a Kristiano. Ngem awan idi ti bagi a manarawidwid ken awan ti nalawag nga us-usaren ni Jesus a mangiwanwan kadagiti pasurotna ditoy daga. (Mat. 28:20) Nupay kasta, impadtona nga addanto mapasamak a panagbalbaliw iti tiempo ti panagani.

³ “Asino a talaga ti matalek ken masirib nga adipen?” Iti dayta a saludsod ni Jesus, nangted iti maysa a pangngarig, wenno ilustrasion, kas paset ti “pagilasinan” nga intedna maipapan iti “panungpalan daytoy a sistema ti bambanag.” (Mat. 24:3, 42-47) Impakita ni Jesus nga adu ti trabaho ti matalek nga adipen tapno maipaayan iti naespirituan a taraon ti ili ti Dios “iti umiso a tiempo.” Idi umuna a siglo, nagusar ni Jesus iti grupo dagiti lallaki a mangidaulo imbes a maysa laeng nga indibidual. Bayat ti panagpatingga ti sistema ti bambanag, ti matalek nga adipen nga us-usaren ni Jesus ket saan met a maymaysa nga indibidual no di ket maysa a grupo.

NO ASINO “TI MATALEK KEN MASIRIB NGA ADIPEN”

⁴ Siasino ti dinutokan ni Jesus a mangpakan kadagiti pasurotna? Umiso laeng nga usarenna dagiti napulotan a Kristiano ditoy daga. Tukoyen ida ti Biblia kas “papadi nga ari” a nadutokan a ‘mangipakaammo iti tunggal lugar dagiti naisangsangayan a kualidad ti Dios a nangayab kadakuada manipud iti sipnget nga agturong iti nakaskasdaaw a lawagna.’ (1 Ped. 2:9; Mal. 2:7; Apoc. 12:17) Amin kadi a napulotan ditoy daga ket karaman iti matalek nga adipen? Saan. Idi simimilagro a pinakan ni Jesus ti agarup 5,000 a lallaki, malaksid pay kadagiti babbai ken ubbing, intedna ti taraon kadagiti adalanna. Kalpasanna, imbunong met dayta dagiti adalanna kadagiti tattao. (Mat. 14:19) Pinakan ni Jesus ti adu babaen iti sumagmamano laeng a tao. Ita, ipapaayna ti naespirituan a taraon iti kasta met la a pamay-an.

⁵ Gapuna, “ti matalek a mayordomo, daydiay masirib,” ket buklen ti maysa a bassit a grupo dagiti napulotan a kakabsat a lallaki a direkta a mangisagsagana ken mangipapaay iti naespirituan a taraon bayat ti kaadda ni Kristo. (Luc. 12:42) Kadagitoy maudi nga al-aldaw, dagiti napulotan a kakabsat a mangbukel iti “matalek ken masirib nga adipen” ket agkakaduada nga agserserbi idiay hedkuarter. Ita, dagitoy a napulotan a kakabsat ti mangbukel iti Bagi a Manarawidwid dagiti Saksi ni Jehova.

⁶ Us-usaren ni Kristo daytoy a grupo a mangipablaak iti impormasion maipapan iti pannakatungpal dagiti padto ti Biblia ken mangiwanwan iti umiso a tiempo no kasano nga iyaplikar dagiti prinsipio ti Biblia iti inaldaw a panagbiag. Maiwarwaras daytoy a naespirituan a taraon kadagiti lokal a kongregasion dagiti Saksi ni Jehova. (Isa. 43:10; Gal. 6:16) Idi tiempo ti Biblia, ti mapagtalkan nga adipen wenno mayordomo ket agay-aywan iti sangakabbalayan. Naipabaklay met iti matalek ken masirib nga adipen ti responsabilidad a mangaywan iti sangakabbalayan ti pammati. Gapuna, ay-aywanan met ti matalek nga adipen ti material a sanikua, trabaho a panangasaba, programa ti asamblea ken kombension, pannakadutok dagiti manangaywan nga agserbi iti nadumaduma nga annongen iti organisasion, ken panangpataud kadagiti literatura a naibasar iti Biblia a pakagunggonaan dagiti ‘adipen iti balay ti apo.’​—Mat. 24:45.

⁷ Siasino ngarud dagiti ‘adipen iti balay ti apo’? Isuda dagidiay mapakan. Idi damo, amin nga adipen iti balay ti apo ket napulotan. Idi agangay, karamanen kadagiti adipen iti balay ti apo ti dakkel a bunggoy dagiti ‘sabsabali a karnero.’ (Juan 10:16) Agpada a mabenepisiaran ti dua a grupo iti naespirituan a taraon nga ipapaay ti matalek nga adipen.

⁸ Bayat ti dakkel a rigat, inton umay ni Jesus a mangukom iti daytoy dakes a sistema, dutokannanto ti matalek nga adipen a “mangaywan iti amin a sanikuana.” (Mat. 24:46, 47) Dagidiay mangbukel iti matalek nga adipen awatendanto ti nailangitan a gunggonada. Makipagturaydanto ken Kristo idiay langit a kadua ti dadduma pay kadagiti 144,000. Nupay awanton ti matalek ken masirib nga adipen ditoy daga, iwanwanto ni Jehova ken ni Jesus dagiti iturayan ti Mesianiko a Pagarian ditoy daga babaen kadagiti nadutokan nga agserbi kas “piprinsipe.”​—Sal. 45:16.

APAY A “LAGLAGIPENYO DAGIDIAY MANGIDADAULO KADAKAYO”?

⁹ Adu ti rason no apay a ‘laglagipentayo dagidiay mangidadaulo kadatayo’ ken agtalektayo kadakuada. Apay a pagsayaatantayo no aramidentayo daytoy? Kinuna ni apostol Pablo: “Kanayon nga ay-aywanandakayo ket manungsungbatdanto gapu iti dayta. No kasta ti aramidenyo, naragsakda ken dida agladingit a mangaramid iti trabahoda, tapno saan nga agresulta dayta iti pagdaksanyo.” (Heb. 13:17) Rumbeng nga agtulnog ken agpasakuptayo iti panangiwanwan dagidiay mangidadaulo kadatayo ta bambantayandatayo tapno natalged ken masalaknibandatayo iti naespirituan.

¹⁰ Kinuna ni Pablo iti 1 Corinto 16:14: “Mabuyogan koma iti ayat ti amin nga aramidyo.” Dagiti maar-aramid a desision para iti ili ti Dios ket naibatay iti ayat a kangrunaan a galad. Kuna ti 1 Corinto 13:4-8 maipapan iti dayta a galad: “Ti ayat ket naanus ken naimbag. Ti ayat saan a naimon. Saan nga agpangas, saan nga agtangsit, saan a naalas ti panagtigtignayna, saanna a sapulen ti bukodna a pagimbagan, saan a nalaka nga agpungtot. Saan nga agbilbilang iti pannakadangran. Saanna a pagragsakan ti kinakillo, ngem makipagragsak iti kinapudno. Anusanna ti amin a banag, patienna ti amin a banag, namnamaenna ti amin a banag, ibturanna ti amin a banag. Ti ayat saan a pulos agpatingga.” Gapu ta naibatay iti ayat dagiti maar-aramid a desision nga agpaay a pagsayaatan dagiti adipen ni Jehova, makapagtalektayo iti kasta a panangiwanwan. Kasta met, iyanninaw daytoy ti ayat ni Jehova.

¹¹ Idi umuna a siglo, imperpekto a tattao ti inusar ni Jehova a mangidaulo iti ilina. Ngem sakbay pay dayta, inusaren ni Jehova dagiti imperpekto a tattao tapno maitungpal ti pagayatanna. Nangaramid ni Noe iti daong ken inkasabana ti asidegen a pannakadadael idi kaaldawanna. (Gen. 6:13, 14, 22; 2 Ped. 2:5) Nadutokan ni Moises a mangidaulo iti ili ni Jehova a rummuar iti Egipto. (Ex. 3:10) Napaltiingan dagiti imperpekto a tattao a mangisurat iti Biblia. (2 Tim. 3:16; 2 Ped. 1:21) Ti panangusar ni Jehova kadagiti imperpekto a tattao ita a mangidaulo iti trabaho a panangasaba ken panangaramid kadagiti adalan dina pakapuyen ti panagtalektayo iti organisasion ti Dios. Imbes ketdi, mapabilegtayo gapu ta ammotayo a no awan ti tulong ni Jehova, saan a pulos a maitungpal ti organisasion ti amin nga annongenna. Gapu ta inibturan ti matalek nga adipen ti adu a rigat, pammaneknek dayta nga iturturong ida ti espiritu ti Dios. Adu a bendision ti inawat ti makitkita a paset ti organisasion ni Jehova ita. Naimpusuan ngarud a suportaran ken agtalektayo iti dayta.

NO KASANO NGA IPAKITA TI PANAGTALEKTAYO

¹² Maipakita dagiti addaan annongen iti kongregasion nga agtalekda no siraragsak nga awatenda ken simamatalek nga itungpalda dagiti annongen a naited kadakuada. (Ara. 20:28) Kas manangaskasaba iti Pagarian, naregtatayo nga agbalaybalay, agsarungkar, ken mangyadal iti Biblia iti pagtaengan. (Mat. 24:14; 28:19, 20) Tapno naan-anay a magunggonaantayo iti adu a naespirituan a taraon nga ipapaay ti matalek nga adipen, agsaganatayo a naimbag ken tabunuantayo dagiti Nakristianuan a gimong, agraman dagiti asamblea ken kombension. Makapagpipinnaregtatayo no makitimpuyogtayo kadagiti kakabsattayo kadagitoy a Nakristianuan a gimong.​—Heb. 10:24, 25.

¹³ Maipakitatayo ti panagtalektayo iti organisasion no mangtedtayo iti material a kontribusion. (Prov. 3:9, 10) No makitatayo nga agkasapulan iti material dagiti kakabsattayo, tumulongtayo a dagus. (Gal. 6:10; 1 Tim. 6:18) Aramidentayo daytoy gapu ta ay-ayatentayo dagiti kakabsattayo ken kanayon a nakasaganatayo kadagiti gundaway a mangipakita iti panagyamantayo ken ni Jehova ken iti organisasionna gapu iti kinaimbagna kadatayo.​—Juan 13:35.

¹⁴ Maipakitatayo met nga agtalektayo iti organisasion no suportarantayo dagiti maar-aramid a desision. Ramanen daytoy ti sipapakumbaba a panangsurot iti panangiwanwan dagiti mangidadaulo, kas kadagiti manangaywan iti sirkito ken panglakayen iti kongregasion. Karaman dagitoy a kakabsat kadagiti “mangidadaulo” a masapul a pagtulnogan ken pagpasakupantayo. (Heb. 13:7, 17) Uray no saantayo a maawatan a naan-anay no apay a naaramid ti maysa a desision, ammotayo a pagimbagantayo no suportarantayo dayta. Kas resultana, bembendisionannatayo ni Jehova gapu iti panagtulnogtayo iti Saona ken iti organisasionna. Iti kasta, ipakpakitatayo nga agpaspasakuptayo iti Apotayo a ni Jesu-Kristo.

¹⁵ Wen, rumbeng laeng nga agtalektayo a naan-anay iti matalek ken masirib nga adipen. Ni Satanas, a dios daytoy a sistema ti bambanag, ar-aramidenna ti amin a kabaelanna tapno maibabain ti nagan ni Jehova ken ti organisasionna. (2 Cor. 4:4) Dikay paallilaw kadagiti dakes a taktika ni Satanas! (2 Cor. 2:11) Ammona nga “ababan ti tiempona” sakbay a maitapuak iti mangliwengliweng nga abut, ket ikagkagumaanna nga iyadayo ti adu kadagiti adipen ni Jehova. (Apoc. 12:12) Ngem bayat nga ar-aramiden ni Satanas ti amin a kabaelanna, ad-adda koma nga umadanitayo ken Jehova. Agtalektayo koma ken Jehova ken iti organisasion nga us-usarenna ita a mangiwanwan iti ilina. No aramidentayo dayta, adda panagkaykaysatayo nga agkakabsat.