Inabak ni Gideon Dagiti Midianita

Idi agangay, nagsardeng manen nga agdayaw ken Jehova dagiti Israelita ket nagdaydayawda kadagiti ulbod a dios. Pito a tawen a tinaktakaw dagiti Midianita dagiti tarakenda nga animal ken dinadaelda dagiti mulada. Tapno malemmengan ida dagiti Israelita, napanda kadagiti kueba ken bambantay. Nagpakaasida ken Jehova nga isalakanna ida. Isu a nangibaon ni Jehova iti maysa nga anghel iti lalaki nga agnagan Gideon. Imbaga ti anghel: ‘Pinilinaka ni Jehova nga agbalin a nalaing a mannakigubat.’ Insaludsod ni Gideon: ‘Kasanok a maisalakan ti Israel? Nanumoak laeng a tao.’

Ngem kasano a masigurado ni Gideon a pinili isuna ni Jehova? Nangikabil ni Gideon iti lupot a delana (wool) iti daga sa imbagana ken Jehova: ‘Inton bigat, no nabasa ti delana iti linnaaw ngem namaga ti daga, maammuakto a kayatmo nga isalakanko ti Israel.’ Kabigatanna, nabasa ti delana ngem namaga ti daga! Ngem indawat ni Gideon nga iti sumaruno nga aldaw, namaga koma ti delana ken nabasa ti daga. Idi napasamak dayta, siguradon ni Gideon a pinili isuna ni Jehova. Inurnongna dagiti soldadona tapno makilaban kadagiti Midianita.

Imbaga ni Jehova ken Gideon: ‘Pangabakekto ti Israel. Ngem gapu ta adu unay ti soldadom, mabalin a panunotenyo a mangabakkayo iti gubat uray awan ti tulongko. Ibagam nga agawiden dagiti mabuteng.’ Isu a nagawid ti 22,000 a soldado, ket 10,000 ti nabati. Kalpasanna, imbaga ni Jehova: ‘Adu latta dagiti soldado. Mapankayo iti waig ket ibagam nga uminumda iti danum. Piliemto laeng dagidiay agsipsiput no adda kalaban bayat nga umin-inumda.’ Tallo gasut laeng a lallaki ti nagsiput bayat nga umin-inumda. Inkari ni Jehova nga abaken dagitoy a lallaki ti 135,000 a soldado a Midianita.

Iti dayta a rabii, imbaga ni Jehova ken Gideon: ‘Gubatenyon dagiti Midianita!’ Inikkan ni Gideon dagiti soldadona kadagiti tangguyob ken karamba nga adda naikabil a pagsilawan iti unegna. Imbagana kadakuada: ‘Buyaendak sa tuladendak.’ Pinuyotan ni Gideon ti tangguyobna, binurakna ti karamba, inwagaywayna ti pagsilawan, sa impukkawna: ‘Ti espada ni Jehova ken ni Gideon!’ Inaramid met dayta ti 300 a soldadona. Napabutngan dagiti Midianita ket komporme ti nagtartarayanda. Didan ammo ti ar-aramidenda isu a nagpipinnatayda. Tinulongan manen ni Jehova dagiti Israelita tapno maabakda dagiti kalabanda.