“Ti Kampilan ni Jehova ken ni Gideon!”

KAS kadagiti dudon ti kaaduda, a pinaglangalangda ti nadam-eg a kataltalonan. Napasamak dayta bayat ti panagturay dagiti uk-ukom iti Israel, idi a naawananen iti namnama dagiti Israelita. Iti uneg ti pito a tawen, dagiti manangsamsam a bunggoy dagiti nakakamelio a Midianita, Amalekita, ken dagiti taga Daya rautenda ti daga apaman a mangrugi nga agtubo dagiti bunubon. Dagiti bunggoy dagiti tulisan agwarasda nga agsapul iti gamgamenda, a samsamenda ti amin a mulmula. Ngem ti ili ti Israel awananda iti asno, toro, wenno karnero. Nakaal-alingget ti panagturay dagiti Midianita isu a dagiti napanglaw nga Israelita napilitanda nga agilemmeng kadagiti bambantay, rukib, ken luglugar a narigat a danonen.

Apay a nagbanagda a kasta? Agserserbi ngamin ti Israel kadagiti didiosen. Gapuna, binaybay-an ida ni Jehova iti ima dagiti manangirurumen. Idi saanen a maibturan ti Israel ti kasasaad, inyararawda a tulongan ida ni Jehova. Umimdeng ngata ti Dios? Ania ti masursurotayo iti kapadasan ti Israel?​—Uk-ukom 6:1-6.

Naannad a Mannalon Wenno Maysa a “Maingel, Mannakabalin”?

Dagiti Israelita gagangay nga irikenda ti trigo babaen ti tulong ti kapon a baka ken pasagad iti nalayang, naangin a lugar tapno nalaka ti panagtaep. Ngem no kasta ti panagirikda, nalaka la a makita ida dagiti tulisan a determinado a mangsamsam iti daga. Gapuna, nagirik ni Gideon iti trigo babaen ti pagpespesan iti ubas​—a nalabit maysa a dakkel, nalinongan a tangke a bato. (Uk-ukom 6:11) Dita a mabalin a nabatbat dagiti apit iti saggabassit laeng. Gapu iti kasasaad, inusar ni Gideon no ania ti adda.

Panunotenyo laengen ti pannakasorpresa ni Gideon idi agparang kenkuana ti anghel ni Jehova a mangibagbaga: “Ni Jehova adda kenka, sika a maingel, mannakabalin.” (Uk-ukom 6:12) Kas maysa a lalaki a nalimed nga agir-irik iti pagpespesan ti ubas, saan la ketdi a narikna ni Gideon nga isu ket maingel. Ngem dagita a sasao ipasimudaagna nga agtalek ti Dios a kabaelan ni Gideon ti agbalin a maingel a lider. Agpapan pay kasta, kasapulanna ti makombinsir.

Idi isu ket dinutokan ni Jehova a ‘mangisalakan iti Israel manipud iti dakulap ti Midian,’ sipapakumbaba a kuna ni Gideon: “Dispensarennak, Jehova. Anianto ti pangisalakanko iti Israel? Adtoy! Ti sangaribuk isu ti kanunumuan iti Manases, ket siak ti kabassitan iti balay ni amak.” Ti naannad a ni Gideon nagkiddaw iti tanda a mangipakita a tumulong kenkuana ti Dios iti panangparmekna iti Midian, isu a sidadaan a pinatgan ni Jehova ti pammatalged a rasonable a kidkiddawen ni Gideon. Idi agangay, pinakan ni Gideon ti bisitana nga anghel, ket adda apuy a nagtaud iti bato a nanguram iti datonna. Kalpasan ti panangpakired kenkuana ni Jehova, nangbangon ni Gideon iti maysa nga altar iti dayta a lugar.​—Uk-ukom 6:12-24.

“Bay-anyo ni Baal a Mangaramid iti Legal a Panangikalintegan”

Ti kadakkelan a parikut ti Israel ket saan a ti panangirurumen dagiti Midianita no di ket ti pannakaigamerda iti panagdayaw ken Baal. Ni Jehova ket “naimon a Dios,” ket saanna a pakaay-aywan no adda asinoman nga agserserbi kenkuana nga agdaydayaw kadagiti sabali a dios. (Exodo 34:14) Gapuna, binilin ni Jehova ni Gideon a dadaelenna ti altar ni amana ken rebbaenna ti sagrado a teddek a nairanta ken ni Baal. Gapu iti panagamakna iti reaksion ni amana ken dagiti sabsabali no aramidenna dayta iti aldaw, nagtignay ni Gideon iti rabii, babaen ti tulong ti sangapulo nga adipen.

Nainkalintegan ti panagannad ni Gideon, gapu ta idi naammuan dagiti agdaydayaw ken ni Baal ti panangdadaelna kadagiti ibilangda a sagrado, kinalikagumanda ti pannakapapatayna. Ngem babaen ti di mabalusingsing a lohika, ni Joas nga ama ni Gideon inkalinteganna kadagiti tattao a no ni Baal isu ti Dios, kabaelanna nga ikanawa ti bagina. Gapuna, siuumiso nga inawagan ni Joas ti anakna iti Jerubaal, a kaipapananna “Bay-anyo ni Baal a Mangaramid iti Legal a Panangikalintegan Maibusor Kenkuana.”​—Uk-ukom 6:25-32, footnote ti New World Translation of the Holy Scriptures ​—With References.

Kanayon a bendisionan ti Dios dagiti adipenna a simamaingel a mangsalimetmet iti pudno a panagdayaw. Idi a dagiti Midianita ken dagiti kaaliadoda rimmautda manen iti teritoria dagiti Israelita “ti espiritu ni Jehova binalkutna ni Gideon.” (Uk-ukom 6:34) Iti sidong ti impluensia ti espiritu wenno aktibo a puersa ti Dios, nangurnong ni Gideon kadagiti bunggoy manipud kadagiti tribo ni Manases, Aser, Zabulon, ken Neftali.​—Uk-ukom 6:35.

Panagsagana nga Agtignay

Nupay addaan itan ni Gideon iti buyot a 32,000, nagkiddaw latta iti tanda manipud iti Dios. No ti dutdot iti pagirikan ket malinnaawan idinto ta agtalinaed a namaga ti daga, ipasimudaag dayta a ti Dios ispalenna ti Israel babaen kenkuana. Inaramid ni Jehova dayta a milagro. Immawat met ni Gideon iti pammatalged idi nagkiddaw manen iti sabali a tanda​—nabasa a daga ken namaga a dutdot. Nalabes kadi ti kinaannad ni Gideon? Nalawag a saan, agsipud ta pinatgan ni Jehova ti kiddawna a pammatalged. (Uk-ukom 6:36-40) Saantayo a namnamaen dagiti kasta a milagro ita. Kaskasdi, mabalintayo ti umawat iti panangiwanwan ken pammatalged ni Jehova manipud iti Saona.

Ita, kinuna ti Dios a dakkel unay ti bunggoy ni Gideon. No maparmekda dagiti kabusorda babaen ti kasta kadakkel a buyot, mabalin nga ipagpannakkel dagiti Israelita a naispalda gapu iti bukodda a pigsa. Ngem masapul a ni Jehova ti mapadayawan iti panagbiktoriada. Ti solusion? Masapul a suroten ni Gideon ti sagudayen ti Mosaiko a Linteg ket pagawidenna dagiti agbuteng. Kas resulta, 22,000 kadagiti pasurotna ti nagawid, ket 10,000 laeng ti nabati.​—Deuteronomio 20:8; Uk-ukom 7:2, 3.

Kaskasdi, matmatan ti Dios a dakkel pay latta ti buyotna. Naibaga ken ni Gideon a pasalugenna ida iti danum. Sigun iti Judio a historiador a ni Josephus, ti Dios binilinna ni Gideon nga iturongna ti buyotna iti maysa a karayan bayat ti kinadagaang ti aldaw. Aniaman ti naaramid, pinaliiw ni Gideon no kasano ti panaginum dagiti tattaona. Adda laeng 300 a nangikaud iti maysa nga imada iti danum ken nangdildil iti dayta bayat a sipsiputanda no adda rumaut a kabusor. Dagitoy laeng a nasiput a 300 a lallaki ti sumurot ken Gideon. (Uk-ukom 7:4-8) Iladawanyo iti panunotyo a dakayo dagitoy a lallaki. Yantangay 135,000 ti kaadu dagiti kabusor, sigurado a mapanunotyo a makapagballigikayo laeng babaen ti bileg ni Jehova, saan nga iti bukodyo!

Ti Dios binilinna ni Gideon a mangikuyog iti katulong ket simisimenda ti pakarso dagiti Midianita. Bayat ti kaaddada sadiay, naallingag ni Gideon ti maysa a lalaki a mangisalsalaysay iti tagtagainepna iti kaduana, a dagus a nangipaulog a ti tagtagainepna kaipapananna nga inkeddeng ti Dios a parmeken ni Gideon ti Midian. Dayta ti kasapulan unay ni Gideon a pammaregta. Masiguradona a pagballigien ni Jehova ti pannakigubatna ken dagiti 300 a tattaona maibusor kadagiti Midianita.​—Uk-ukom 7:9-15.

Taktika iti Pannakigubat

Dagiti 300 a lallaki ket nabingay iti tallo a bunggoy a sagsasangagasut. Tunggal lalaki ket naipaayan iti tangguyob ken dakkel nga awan kargana a gorita. Adda lampara a naidulin iti gorita. Kastoy ti umuna a bilin ni Gideon: ‘Imatangandak, ket aramidenyo ti aramidek. Inton puyotak ti tangguyob, puyotanyo met dagiti tangguyobyo, ket ipukkawyo “Ti kampilan ni Jehova ken ni Gideon!”’​—Uk-ukom 7:16-18, 20.

Dagiti 300 nga Israelita a mannakigubat sikukurimed a napanda iti igid ti pakarso dagiti kabusor. Agarup alas dies ti rabii idi​—kalpasan unay ti panagsukat dagiti guardia. Agparang a dayta ti kasayaatan nga oras ti iraraut, agsipud ta agkurkuridemdem pay laeng ti panagkita dagiti kasuksukat a guardia iti kasipngetan.

Anian a pannakaklaat dagiti Midianita! Kellaat a nasinga ti kinatalna idi maburak dagiti 300 a gorgorita, mapaguni a sipipigsa dagiti 300 a tangguyob, ken agpukkaw dagiti 300 a lallaki. Gapu iti pannakakigtot dagiti Midianita, nangruna gapu iti ikkis a “Ti kampilan ni Jehova ken ni Gideon!,” nagiikkisda met isu nga ad-adda nga immariwawa. Gapu iti pannakariribukda, dida pulos malasin no siasino ti kabusorda. Dagiti 300 a lallaki nagtalinaedda a sitatakder bayat a ti Dios tinignayna dagiti kabusor nga agpipinnatay babaen dagiti kampilanda. Naabug dagiti kabusor iti pakarso, nalapdan ti panaglibas, ken naparmek dagiti nabatbati a kabusor ket naan-anay a saanen a pangta dagiti Midianita. Nagpatingga met laengen kamaudiananna ti naunday ken naulpit a panangraut dagiti tulisan.​—Uk-ukom 7:19-25; 8:10-12, 28.

Naemma ni Gideon uray kalpasan daytoy nga iraraut. Idi nakisubang kenkuana dagiti Efraimita, nga agparang a nainsulto gapu iti saanda a pannakaawag a makigubat, siaalumamay a simmungbat ni Gideon. Gapu iti naalumamay a sungbatna, bimmaaw ti pungtot dagiti Efraimita ket nagkalmada.​—Uk-ukom 8:1-3; Proverbio 15:1.

Ita ta naipasdek ti talna, indagadag dagiti Israelita a ni Gideon ti agbalin nga arida. Anian a makagargari dayta! Ngem linaksid dayta ni Gideon. Saanna a linipatan no siasino ti talaga a nangparmek iti Midian. “Siak saanakto nga agturay kadakayo, wenno uray ti anakko saanto nga agturay kadakayo,” inwaragawagna. “Ni Jehova isu ti agturayto kadakayo.”​—Uk-ukom 8:23.

Ngem gapu ta imperpekto, saan a kanayon a nasayaat ti pangngeddeng ni Gideon. Gapu iti di naibaga a rason, nagaramid ni Gideon iti efod manipud kadagiti samsam iti gubat ket impabuyana dayta iti siudadna. Ibaga ti rekord a ti intero nga Israel nangrugi a maaddaan iti “imoral a pannakidenna” iti efod. Dinayawda dayta, ket nagbalin dayta a silo uray ken ni Gideon ken iti sangakabbalayanna. Ngem saan a naibilang ni Gideon kas naan-anay a managrukbab kadagiti idolo yantangay isu ket ibilang ti Kasuratan kas maysa a manamati ken ni Jehova.​—Uk-ukom 8:27; Hebreo 11:32-34.

Dagiti Masursurotayo

Ti pakasaritaan ni Gideon ket mangipaay kadagiti leksion nga agpada a pakaballaagan ken pakaparegtaan. Ballaagannatayo a no ikkaten ni Jehova ti espiritu ken bendisionna kadatayo gapu iti kinasukirtayo, ti naespirituan a kasasaadtayo ket agbalin a kas kadagiti napanglaw nga agnaed iti daga a dinidigra dagiti dudon. Agbibiagtayo iti narigat a tiempo ket rumbeng a saantayo a pulos liplipatan a ti bendision ni Jehova ti “mangpabaknang, ket awan rigat nga inayonna iti dayta.” (Proverbio 10:22) Tagtagiragsakentayo ti bendision ti Dios agsipud ta ‘agserserbitayo kenkuana buyogen ti naan-anay a puso ken buyogen ti naragsak a kararua.’ No saan a kasta, ilaksidnatayo.​—1 Cronicas 28:9.

Makaparegta kadatayo ti salaysay maipapan ken ni Gideon agsipud ta paneknekanna a kabaelan ni Jehova nga isalakan ti ilina iti aniaman a peggad, uray babaen ti panangusarna kadagidiay agparang a nakapuy wenno awanan gaway. Ti naaramidan ni Gideon ken dagiti 300 a tattaona a panangparukma iti 135,000 a Midianita paneknekanna ti di matukod a pannakabalin ti Dios. Mabalin a maipasangotayo kadagiti narigat a kasasaad ken kasla awan gawaytayo kadagiti nagadu a kabusortayo. Kaskasdi, ti salaysay ti Biblia maipapan ken ni Gideon paregtaennatayo nga agtalek ken ni Jehova, daydiay mangbendision ken mangispal kadagiti amin a mangipakita iti pammati kenkuana.