Inkararag ni Hanna a Maaddaan iti Anak a Lalaki

Dua ti asawa ti Israelita nga agnagan Elkana, isu da Hanna ken Penina, ngem mas ay-ayaten ni Elkana ni Hanna. Adu ti annak ni Penina ngem awan anak ni Hanna, isu a kanayon nga uy-uyawenna ni Hanna. Kada tawen, mapmapan ni Elkana ken ti pamiliana iti tabernakulo idiay Silo tapno agdaydayaw. Naminsan, idi addada sadiay, nadlawna a nakalidliday ni Hanna. Imbagana: ‘Dikan agsangsangit, Hanna. Addaak met. Ay-ayatenka.’

Idi kuan, napan nagkararag ni Hanna. Napalalo ti sangitna nga agpakpakaasi ken Jehova. Inkarina: ‘Jehova, no ikkannak iti anak a lalaki, itedkonto kenka, ken agserbinto kenka iti intero a panagbiagna.’

Nakita ti nangato a padi a ni Eli nga agsangsangit ni Hanna, ket pinanunotna a nabartek. Ngem imbaga ni Hanna: ‘Saanak a nabartek, apok. Adda nadagsen a problemak ket ibagbagak ken Jehova.’ Nabigbig ni Eli a nagkamali isuna ket imbagana: ‘Ited koma ti Dios ti dawdawatem.’ Limmag-an ti rikna ni Hanna ket pimmanawen. Awan pay makatawen, naaddaan iti anak a lalaki ket pinanagananna iti Samuel. Ania ngata ti narikna ni Hanna?

Saan a nalipatan ni Hanna ti karina ken Jehova. Idi napusotnan ni Samuel, impanna iti tabernakulo tapno agserbi. Imbagana ken Eli: ‘Daytoy ti ubing a lalaki nga inkararagko. Kukua isunan ni Jehova iti intero a panagbiagna.’ Kada tawen, bisbisitaen da Elkana ken Hanna ni Samuel ken ik-ikkanda iti baro a bado nga awan imana. Inikkan pay ni Jehova ni Hanna iti tallo nga annak a lallaki ken dua nga annak a babbai.