ANNA
[Parabur, Asi].
Ina ni mammadto Samuel. Nakipagnaed ni Anna iti Levita nga asawana a ni Elcana ken iti sabali pay nga asawa ni Elcana a ni Penina idiay Ramataim-zofim iti nakabambantay a rehion ti Efraim. Iti laksid ti nabayag a kinalupes ni Anna, a kasungani ti panagipasngay ni Penina iti sumagmamano nga annak, ni Anna pay laeng ti ad-adda a dungdungnguen nga asawa ni Elcana. Ni Penina rinurodna ni Anna gapu iti kinalupesna, nangnangruna idi intugot ni Elcana ti pamiliana iti tinawen a panagparangda iti tabernakulo idiay Silo.—1Sm 1:1-8.
Iti maysa nga isasarungkar idiay Silo, ni Anna inkarina ken Jehova a no makaipasngay iti anak a lalaki, ipaayna ken Jehova, iti panagserbi Kenkuana. Iti pannakakitana nga aggargaraw dagiti bibig ni Anna bayat nga agkarkararag a di mangngeg, ni Nangato a Padi nga Eli nagatap idi damo nga isu ket naigamer iti kasta unay iti arak ket nabartek. Ngem idi naammuanna ti managparbeng a kinaregget ken kinapasnek ni Anna, inyebkasna ti kalikagum nga ited koma ni Jehova a Dios ti dawatna. Pudno unay, di nagbayag nagsikog. Kalpasan ti panangipasngayna ken Samuel, saanen a napan idiay Silo agingga a napusot ni Samuel. Kalpasanna isu indatagna ken Jehova kas iti inkarina, a nangyeg iti daton a buklen ti maysa a toro a tallo ti tawenna, maysa nga efa nga arina, ken dakkel a karamba nga arak. (1Sm 1:9-28) Kada tawen kalpasan dayta, no mapan idiay Silo, mangitugot ni Anna iti baro nga awan manggasna a lambon nga agpaay iti anakna. Isu binendisionan manen ni Eli, ket linuktan manen ni Jehova ti aanakanna iti kasta nangipasngay idi agangay iti tallo nga annak a lallaki ken dua nga annak a babbai—1Sm 2:18-21.
Adda sumagmamano a matarigagayan a kualidad a mapaliiw ken Anna. Isu managkararag ken napakumbaba, ket addaan iti tarigagay a mangay-ayo iti asawana. Kada tawen kinuyogna ti asawana nga agisakripisio idiay tabernakulo. Nangaramid iti bukodna a dakkel a panagsakripisio, nga insukona ti pannakikadua iti anakna, tapno matungpalna ti saona ken maipakitana ti panangapresiar iti kinamanangngaasi ni Jehova. Tinaginayonna ti nainaan a panagayatna, kas impakita ti panangaramidna iti baro a lambon nga agpaay ken Samuel kada tawen. Dagiti kapanunotan a nayebkas iti kantana iti panagyaman, idi isu ken ni Elcana indatagda ni Samuel maipaay iti panagserbi iti templo, ket umas-asping iti rikrikna nga inyebkas ni Maria kalpasan la unay a naammuanna nga isu ti mangipasngay iti Mesias.—Lu 1:46-55.