Templo Para ken Jehova

Idi nagbalin ni Solomon nga ari ti Israel, insaludsod ni Jehova: ‘Ania ti kayatmo nga itedko kenka?’ Imbaga ni Solomon: ‘Ubingak pay, ket diak ammo ti ar-aramidek. Pangngaasim, ikkannak iti sirib tapno maaywanak dagiti tattaom.’ Kinuna ni Jehova: ‘Gapu ta sirib ti dinawatmo, pagbalinenka a kasisiriban a tao. Pagbalinenkanto met a nakabakbaknang. Ket no agtulnogka kaniak, atiddogto ti biagmo.’

Rinugian ni Solomon nga ipatakder ti templo. Inusarna ti kasayaatan a balitok, pirak, kayo, ken bato. Rinibu a nalalaing a lallaki ken babbai ti nagtrabaho iti templo. Kalpasan ti pito a tawen, nalpasen ti templo ket mabalinen nga idedikar ken Jehova. Adda altar iti templo a nakabilan kadagiti daton. Nagparintumeng ni Solomon iti sango ti altar ket inkararagna: ‘O Jehova, kurang ti kadakkel ken kapintas daytoy a templo tapno maikari para kenka, ngem pangngaasim ta awatem ti panagdayawmi ken denggem dagiti kararagmi.’ Ania ti narikna ni Jehova idi nalpasen ti templo ken nangngegna ti kararag ni Solomon? Kalpasan la unay ti kararag ni Solomon, adda nagtinnag nga apuy ket napuoran dagiti daton. Naragsakan ni Jehova iti templo. Idi nakita dayta dagiti Israelita, naragsakanda.

Sikat ni Ari Solomon iti intero nga Israel ken uray kadagiti adayo a lugar gapu iti siribna. Napan kenkuana dagiti tattao tapno agpatulong kadagiti problemada. Napan uray ti reyna ti Sheba ket pinagsaludsodanna ni Solomon kadagiti naririgat a saludsod. Idi nangngegna dagiti sungbatna, imbagana: ‘Diak idi mamati kadagiti ibagbaga dagiti tattao maipapan kenka, ngem ita, napaneknekak a nasirsiribka pay ngem iti ibagbagada. Binendisionannaka ti Diosmo a ni Jehova.’ Nagsayaat idi ti biag dagiti Israelita ken naragsakda. Ngem nagbaliw ti situasion.