Dagiti Pader ti Jerusalem

Agsublita iti sumagmamano a tawen. Ni Nehemias, nga adipen ni Ari Artaxerxes, ket maysa nga Israelita nga aggigian idiay Susan, a siudad ti Persia. Maysa nga aldaw, simmangpet ti kabsatna a naggapu idiay Juda ket impadamagna: ‘Delikado ti situasion dagiti nagsubli idiay Jerusalem. Saan pay a naibangon dagiti pader ken ruangan ti siudad a dinadael dagiti taga-Babilonia.’ Nalidayan ni Nehemias. Kayatna ti mapan tumulong idiay Jerusalem, isu nga inkararagna a palubosan koma ti ari.

Idi agangay, nadlaw ti ari a naliday ni Nehemias. Kinunana: ‘Ita pay laeng a nakitaka a kasta. Ania ti problemam?’ Imbaga ni Nehemias: ‘Kasano a diak malidayan ket nadadaelen ti Jerusalem, ti siudad a nakayanakak?’ Insaludsod ti ari: ‘Ania ngarud ti kayatmo?’ Dagus a nagkararag ni Nehemias iti naulimek, ket imbagana iti ari: ‘Pangngaasim, palubosannak a mapan idiay Jerusalem tapno bangonek manen dagiti pader.’ Pinalubosan ti ari ni Nehemias, ket siniguradona a saan a maan-ano bayat ti napaut a biahena. Pinagbalinna pay ni Nehemias a gobernador ti Juda ken inikkanna kadagiti kayo para iti pannakaaramid dagiti ruangan ti siudad.

Idi nakasangpet ni Nehemias idiay Jerusalem, kinitana dagiti pader ti siudad. Kalpasanna, inummongna dagiti papadi ken agtuturay ket imbagana: ‘Nagrigat ti situasiontayo. Masapul nga agtrabahotayon.’ Rinugianda ngarud a bangonen dagiti pader.

Ngem pinagang-angawan ida dagiti kalabanda. Imbagada: ‘Ulien la ti atap nga aso ti pader nga ibangbangonyo, marban.’ Saan nga inkankano dayta dagiti agtrabtrabaho. Intultuloyda ti nagibangon agingga a ngimmato ken timmibker ti pader.

Implano dagiti kalaban nga aggapuda iti nagduduma a lugar sa bigla a rautenda ti Jerusalem. Idi naammuan dayta dagiti Judio, nagbutengda. Ngem imbaga ni Nehemias: ‘Dikay agbuteng. Tulongannatayo ni Jehova.’ Nangipuesto ni Nehemias kadagiti guardia tapno maprotektaran dagiti agtrabtrabaho, ket saan ida a naraut dagiti kalabanda.

Iti 52 laeng nga aldaw, naibangon dagiti pader ken ruangan. Inayaban ni Nehemias ti amin a Levita para iti inagurasion. Biningayna ida iti dua a grupo dagiti kumakanta. Immulida iti pader babaen iti agdan iti Ruangan ti Ubbog. Nagmartsa ti dua a grupo iti agsumbangir a direksion ket linawlawda ti siudad. Pinatokarda dagiti trumpeta, piangpiang, ken arpa ken kinantaanda ni Jehova. Kimmadua ni Esdras iti maysa a grupo, ket nakikadua ni Nehemias iti sabali a grupo. Nagmartsada agingga a nagsabatda iti templo. Nagidaton ken Jehova ti amin a lallaki, babbai, ken ubbing, ken nagragragsakda. Nangngeg iti adayo ti panagragragsakda.