Dagiti Nasirmata ni Juan

Idi nakabalud ni apostol Juan iti isla ti Patmos, nangipakita ni Jesus kenkuana iti 16 nga agsasaruno a sirmata, wenno ladawan, maipapan iti masanguanan. Naipakita kadagitoy a sirmata no kasano a maidaydayaw ti nagan ni Jehova, no kasano nga umay ti Pagarianna, ken no kasano a maaramid ti pagayatanna ditoy daga a kas idiay langit.

Iti maysa a sirmata, nakita ni Juan ni Jehova a nakatugaw iti nadayag a tronona idiay langit ken napalawlawan iti 24 a panglakayen a nakabado iti puraw ken nakoronaan iti balitok. Adda kimat ken uni ti gurruod nga aggapgapu iti trono. Agrukruknoy ti 24 a panglakayen ken Jehova ken agdaydayawda kenkuana. Iti sabali pay a sirmata, nakakita ni Juan iti dakkel a bunggoy, wenno nakaad-adu a tattao, a naggapu iti amin a nasion, ili, ken lengguahe nga agdaydayaw ken Jehova. Ipaspastoran ida ti Kordero a ni Jesus ken iturturongna ida kadagiti danum ti biag. Iti sabali pay a sirmata, nakita ni Juan a nangrugi nga agturay ni Jesus kas Ari idiay langit a kaduana ti 24 a panglakayen. Iti simmaruno a sirmata, nakita ni Juan a makigubgubat ni Jesus iti dragon a ni Satanas ken kadagiti demoniona. Intapuak ida ni Jesus ditoy daga.

Kalpasanna, nakakita ni Juan iti nagpintas a ladawan ti Kordero a kaduana ti 144,000 nga agtaktakder iti Bantay Sion. Nakakita met iti anghel nga agtaytayab iti tangatang, a mangibagbaga kadagiti tattao nga agbutengda iti Dios ken idaydayawda.

Iti simmaruno a sirmata, nangrugi ti gubat ti Armagedon. Iti dayta a gubat, inabak ni Jesus ken dagiti kakaduana ti dakes a sistema ni Satanas. Iti maudi a sirmata, nakita ni Juan nga addan panagkaykaysa idiay langit ken ditoy daga. Naan-anay a nadadael ni Satanas ken ti kaputotanna. Amin nga adda idiay langit ken adda ditoy daga idaydayawda ti nagan ni Jehova ken isu laeng ti daydayawenda.