ADALEN 18

Makaisuro Kadagiti Agdengdengngeg

1 Corinto 9:19-23

SUMARIO: Pagpanunotem dagiti agdengdengngeg tapno mariknada nga adda napateg a nasursuroda.

Ikabilangam ti dati nga ammo dagiti agdengdengngeg. Imbes nga ulitem lattan ti dati nga ammoda, tulongam ida a makasursuro iti baro a banag iti topikom.

Alistuam nga ilawlawag dagiti pamiliar a punto, ngem in-inayadem nga ilawlawag dagiti baro nga ideya.
Agsukimatka ken agpanunotka a naimbag. No posible, agusarka kadagiti di unay pamiliar nga impormasion wenno agdama a pasamak no ilawlawagmo dagiti napateg nga ideya. Panunotem a naimbag ti materialmo ken ti koneksion dayta iti impormasion a kayatmo a dakamaten.

Bayat nga ad-adalem ti material, panunotem dagiti saludsod kas iti ‘ania, apay, kaano, sadino, asino, ken kasano.’ Pagbalinem a nabiag ti panangisurom babaen ti panangusar ken panangsungbatmo iti dadduma kadagita a saludsod iti intero a presentasionmo.
Ipakitam a makatulong ti mensahem. Ilawlawagmo no kasano a makatulong dagiti punto iti Kasuratan iti inaldaw a panagbiag dagiti agdengdengngeg. Ilawlawagmo dagiti espesipiko a situasion, kababalin, ken aramid a pamiliar kadakuada.