ABAGTA

Ti nagan ti maysa kadagiti pito nga opisial ti palasio a nagserbi iti Persiano nga ari a ni Asuero nga asawa ti Judia a ni Ester, iti palasiona idiay Susan nga agdama idi a kabesera ti Persia.​—Est 1:10.

Iti King James Version, naikuna a maysa ni Abagta kadagiti pito a “mayordomo,” ket ti notasion iti marhin kunaenna a “eunuko.” Nupay masansan idi a maar-aramat dagiti eunuko kas mapagtalkan nga ad-adipen kadagiti naarian a sangakabbalayan kadagiti pagilian iti Makintengnga a Daya, ti kangrunaan a kaipapanan ti orihinal a Hebreo a sao a sa·risʹ ket “opisial ti palasio,” ket segundario laeng ti kaipapananna a kapon a tao. Yantangay dagitoy pito nga opisial ti palasio ket agserserbi iti ari ken nalawag a saan a nadutokan kas agaywan kadagiti babbai (a kas ken Hegai, ti eunuko ti ari a nadakamat iti Ester 2:3), mabalin a saan nga iti pisikal a pamay-an a eunuko dagitoy.