ALABASTRO

Ti nagan dagiti babassit a sinanbasehas a pagkargaan iti bangbanglo nga orihinal a naaramid iti maysa a bato a nasarakan iti asideg ti Alabastron, Egipto. Ti mismo a bato, maysa a kita ti calcium carbonate, nagbalin met a pagaammo babaen iti isu met laeng a nagan. Nagurnong ni David iti “nakaad-adu unay nga alabastro [Heb., shaʹyish] a bato” maipaay iti panangibangon iti templo ni Jehova idiay Jerusalem.​—1Cr 29:2.

Daytoy a kadaanan wenno “Dumaya” nga alabastro saan koma a mapagkamalian nga isu ti agdama nga alabastro, ti nadanuman a calcium sulfate a nalaka a magarumiadan. Ti orihinal nga alabastro ket gagangay a puraw ken, agsipud ta nagbalay nga stalagmite dayta, no dadduma nagaritan iti nagduduma a maris. Gistay katangtangken ti marmol ngem saan a mapasileng unay a kas iti dayta. Ti solido nga alabastro ket nakutukotan wenno nabutbutan nga aglaon iti likido nga agingga iti maysa a libra ti Roma (0.33 kg; 0.72 lb). (Jn 12:3) Ti prasko nga alabastro (Gr., a·laʹba·stron) ket gagangay a nasukog a nailet ti tengngedna a mabalin a siiirut a maseliadoan tapno malapdan a sumngaw ti napateg a banglona.

Idi naaramat dagiti nalaklaka a material a kas iti gypsum a pagaramid iti kakasta a prasko, naawagan met dagitoy iti alabastro gapu laeng iti usar a nakaaramatanda. Nupay kasta, dagiti prasko a naaramid iti pudpudno nga alabastro naaramat maipaay kadagiti nanginngina a sapsapo ken bangbanglo, kas kadagidiay pinangpulot ken Jesus iti dua a gundaway​—naminsan iti balay ti maysa a Fariseo idiay Galilea (Lu 7:37) ken naminsan iti balay ni Simon nga agkukutel idiay Betania.​—Mt 26:6, 7; Mr 14:3.