AMARIAS

[Kinuna ni Jehova].

1. Padi a kaputotan ti anak ni Aaron a ni Eleazar babaen ken Finehas; anak ni Meraiot; ama ni Ahitub; apong ni Sadok, a nagserbi kas segundario a padi bayat ti panagturay ni David ken kas nangato a padi bayat ti panagturay ni Solomon. (1Cr 6:7, 52) Saan a sigurado no nagannong ni Amarias kas nangato a padi, yantangay dayta a saad ket temporario a naipasublat iti balay ni Eli kadagidi a tiempo.

2. Levita a kaputotan ti anak ni Cohat a ni Hebron, karaman a nailista idi binaliwan ni David nga inorganisar ti panagserbi iti templo.​—1Cr 23:1, 12, 19; 24:23.

3. Panguluen a padi “maipaay iti tunggal banag ni Jehova,” nangnangruna no maipapan kadagiti legal a kaso, bayat ti panagturay ni Jehosafat.​—2Cr 19:11.

4. Sabali pay a kaputotan ni Eleazar a nagbiag iti naud-udi a tiempo ngem iti Num. 1 iti ngato. Anak ni Azarias ken ama ti sabali pay nga Ahitub.​—1Cr 6:11; Esd 7:3.

5. Levita a timmulong a nangibunong kadagiti apagkapullo iti papadi kadagiti siudadda bayat ti panagturay ni Ezekias.​—2Cr 31:14, 15.

6. Anak ni Ezekias (nalabit ti ari ti Juda) ken apong-iti-tumeng ni mammadto Sofonias.​—Sof 1:1.

7. Maysa kadagiti kangrunaan a papadi a nagsubli a kadua ni Zorobabel manipud Babilonia, 537 K.K.P. (Ne 12:1, 2, 7) Idi kaaldawan ni Gobernador Nehemias adda maysa a ‘balay ti amma’ ti papadi a naipasurot iti naganna.​—Ne 12:12, 13, 26.

8. Kaputotan ni Binui; maysa kadagidiay namagtalaw iti pagano nga assawada a babbai ken annakda idi kaaldawan ni Esdras.​—Esd 10:10-12, 38, 42, 44.

9. Padi, wenno inapo ti maysa a padi, a nangpatalged iti “mapagpiaran nga urnos” bayat ti kinagobernador ni Nehemias. (Ne 9:38; 10:1, 3) Mabalin a nasurok a 112 ti tawenna idin no isu met laeng ti Num. 7 iti ngato.

10. Inapo dagiti agtataeng iti Jerusalem idi tiempo ni Nehemias; kameng iti tribu ni Juda.​—Ne 11:4.