ANAH

Anak ni Zibeon ken ama ti asawa ni Esau a ni Oholibama. (Ge 36:2, 14, 18, 20, 24, 25; 1Cr 1:34, 40, 41) Iti Genesis 36:2 mabasa ti Hebreo a teksto a “ni Oholibama nga anak ni Anah nga anak a babai ni Zibeon.” Ti Syriac a Peshitta, ti Samaritano a Pentateuch, ken ti Griego a Septuagint agpapada a mabasa kadagitoy ti “anak a lalaki ni Zibeon,” iti kasta makitunos iti Genesis 36:24, a mangipakita a ni Anah ket anak a lalaki ni Zibeon. Tinulad daytoy ti sumagmamano a moderno a patarus ket kunaenda ti “anak a lalaki ni Zibeon” kadagitoy bersikulo 2 ken bersikulo 14. (RS, AT, JB) Nupay kasta, ti Hebreo a sao ditoy maipaay iti “anak a babai” ket addaan met ti nalawlawa a kaipapanan kas apoko a babai ket ngarud, mabalin nga agaplikar daytoy ken Oholibama imbes a ken Anah. Ngarud ti mabasa iti Genesis 36:2 ti Baro a Lubong a Patarus ket: “Ni Oholibama nga anak ni Anah, ti apoko a babai ni Zibeon a Heveo.”

Patien ti dadduma a ti nagan nga Anah ket tumukoy iti dua a tao, yantangay naikuna a “Heveo” ni Anah iti bersikulo 2 idinto ta ti Anah iti bersikulo 20 ken 29 ket naawagan iti “Horeo.” Nupay kasta, no ti termino a “Horeo” kaipapananna laeng ti “agnanaed iti rukib,” mabalin ngarud a naaramat dayta a mangdeskribir iti kaugalian dagiti Seireo a panagnaed iti rukib imbes a pangawag iti kapuonanda. No kasta, agparang a ti sao nga “annak” iti bersikulo 20 ket addaan iti nalawlawa a kaipapanan kas kapkaputotan. Kas kunaen ti Cyclopædia (1882, Tomo I, p. 212) da M’Clintock ken Strong: “Nalawag a ti kapuonan ket saan a nairanta a mangipakita iti linia a nagtaudan dagiti Seireo babaen ti panangsaggaysa kadagidiay a kaputotan a nainaig kadagiti Edomita gapu ta papanguluen ida dagiti tribu. Agparang ngarud a ni Anah, a nagtaudan ti asawa ni Esau, ket panguluen ti tribu a naiduma iti tribu ni amana, ken pumada ti saadna iti dayta a tribu.”