ARAD

1. Maysa kadagiti panguluen a lallaki iti tribu ni Benjamin, nga iti maysa a tiempo nagnaed idiay Jerusalem.​—1Cr 8:15, 28.

2. Maysa a siudad iti makin-abagatan a beddeng ti Canaan, a ti ari dayta rinautna ti Israel bayat ti isusungadda iti Canaan. Dagiti Israelita impaayda dayta a distrito iti pannakadadael ket inawaganda iti “Horma,” a kaipapananna ti “Maysa a Panangipaay iti Pannakadadael.” (Nu 21:1-3; 33:40) Nupay kasta, saanda a nagyan sadiay kalpasanna, ket nabatad a ti sumagmamano kadagiti agnanaed nalisianda ti pannakadadael. Gapuna, nairaman ti ari ti Arad iti listaan ti 31 nga ar-ari a naparmek idi agangay iti pannakigubat ni Josue. (Jos 12:14) Idi kamaudiananna, nagyan dagiti Keneo iti let-ang a tumurong iti abagatan ti Arad.​—Uk 1:16.

Ti Arad ti Israel ket kadawyan a maikunkuna nga isu ti Tel ʽArad, maysa kadagiti nadaeg a munturod iti rehion ti Negeb. Adda dayta iti kasla agallo-allon a tanap agarup 28 km (17 mi) iti daya ti Beer-seba. Kadagiti panagkabakab idiay Tel ʽArad, nasarakan ti agarup 200 nga ostracon, a Hebreo ti agarup kagudua kadagita ket Aramaiko ti dadduma. Kastoy ti mabasa iti maysa a Hebreo a ribak, a naikuna a napetsaan iti maikadua a kagudua ti maikapito a siglo K.K.P.: “Ken apok nga Eliasib: Kiddawen koma ni Jehova ti talnam. . . . Isu agnanaed iti balay ni Jehova.”​—LADAWAN, Tomo 1, p. 325.

Gapu ta awan nasarakan a naudi a tedtedda ti Canaan idiay Tel ʽArad, kunaen ni Y. Aharoni a ti Arad ti Canaan ket adda idi iti Tell el-Milh (Tel Malhata), 12 km (7 mi) iti abagatan a laud ti Tel ʽArad.