ASAIAS

[Nagaramid ni Jah].

1. Maysa a kaputotan ni Merari (maikatlo nga anak ni Levi) ken panguluen ti maysa a balay ti amma. Maysa idi kadagiti panguluen a lallaki iti tengnga dagiti Levita a nagbalin a kameng ti bunggoy dagiti 862 a napili a makipaset iti pannakaisang-at idiay Jerusalem ti lakasa ti tulag, bayat ti maikadua (ken naballigi) a panangpadas ni David.​—1Cr 6:29, 30; 15:4-12.

2. Maysa a panguluen iti tribu ni Simeon idi kaaldawan ni Ari Ezekias (745-717 K.K.P.). Maysa kadagidiay Simeonita a nangparmek iti maysa a nadam-eg a ginget iti lugar ti Gedor, a pagnanaedan idi dagiti Hamita ken dagiti Meunim iti dayta a tiempo.​—1Cr 4:36-41.

3. Naawagan iti “adipen ti ari,” maysa kadagiti lima (indauluan ni Hilkias) nga imbaon ni Ari Josias a mapan ken Hulda a mammadto a babai tapno agimtuodda ken Jehova maipapan iti kaipapanan ti nabiit pay a natakuatan a libro ti Linteg (idi 642 K.K.P.).​—2Ar 22:3, 8, 12-14; 2Cr 34:20, 21.

4. Ti inauna dagiti Silonita (1Cr 9:1-3, 5), nailista a karaman kadagidiay nagsubli manipud Babilonia kalpasan ti pannakaidestiero. Iti Nehemias 11:5, nadakamat ni Maasias kas maysa a “Selanita” a kaputotan ni Juda, ket gapu iti agkaasping a kaipapanan dagiti nagan (Maasias kaipapananna ti “Aramid ni Jehova”), ibilang ti sumagmamano a ti matuktukoy ket maymaysa a tao ken nagtaud ken Sela, ti inaudian nga anak ni Juda babaen iti anak a babai ni Sua a Canaanita.​—Ge 38:2, 5; kitaenyo ti MAASIAS Num. 17.