ASNA

1. Ti ulo ti pamilia ti maysa a Netineo a nakipagsubli ken Zorobabel idiay Jerusalem idi 537 K.K.P. manipud pannakaidestiero idiay Babilonia. (Esd 2:1, 50) Nupay kasta, saanda a nailanad iti umasping a listaan iti Nehemias 7:52.

2. Maysa nga ili ti Juda iti Sefela a nadakamat a kadua ti dadduma pay a siudad, pakairamanan ti Estaol ken Zora. (Jos 15:33) Ti maysa a maipagpagarup a pakainaiganna isu ti purok ti ʽAslin, iti nagbaetan ti Estaol ken Zora, asideg iti igid ti tanap nga adda iti kosta ti Juda.

3. Maikadua nga ili ti Juda, nailista a karaman iti siam a siudad ken nabatad a naab-abagatan ngem iti umuna nga Asna. (Jos 15:43) Awan ti sigurado a pakainaiganna; ti maysa a naisingasing a disso ket Idhna, masarakan iti agarup nagtengngaan ti Hebron ken Laquis, ken agarup 8 km (5 mi) iti daya nga abagatan-a-daya ti Maresah, nga agparang iti isu met laeng a listaan.