AVEN

1. Agparang ti Aven iti Hebreo a Masoretiko a teksto iti Ezequiel 30:17 ken kasta ti pannakaipatarusna iti King James Version. Iti adu a moderno a patarus, mabasa ditoy ti “On,” ti siudad idiay Egipto nga inawagan dagiti Griego iti Heliopolis. Dagiti Hebreo a konsonante maipaay iti Aven ket kapada dagiti konsonante maipaay iti On, ngem nagduma ti ayan ti marka ti bokales. Sigun iti sumagmamano a komentario, ti nagduma nga ayan ti marka ti bokales ket inggagara a panangay-ayam iti sao tapno mayebkas ti panangumsi iti idolatroso a siudad ti On, ti sentro ti Egipcio a panagdaydayaw iti init.​—Kitaenyo ti ON Num. 2.

[2, 3: Pannakapasakit; Maysa a Banag a Makapasakit]

2. Iti Oseas 10:8, agparang ti Aven iti Hebreo a teksto nabatad a kas pangababaan iti Bet-aven.​—Idiligyo ti Os 4:15; 5:8; 10:5; kitaenyo ti BET-AVEN Num. 2.

3. Tukoyen ti Amos 1:5 ti “ginget a tanap ti Aven,” ket iti NW, JP, ken JB, daytoy a Hebreo nga ebkas naipatarus a “Bicat-aven.”​—Kitaenyo ti BICAT-AVEN.