BAAL-GAD

[Makinkukua ken Gad (Naimbag a Kalak-aman)].

Maysa nga ili iti tanap a ginget ti Libano iti arisadsad ti Bantay Hermon, iti makinlaud a sikiganna. Nausar dayta kas pangdeskribir iti kaamiananan a disso a pinarmek ni Josue iti daga ti Canaan, no idilig iti kaabagatanan a disso, ti Bantay Halac iti Negeb. (Jos 11:17; 12:7; 13:5) Di masigurado ti eksakto nga ayanna, ngem kadawyan a maikunkuna nga isu dayta ti Hasbaiya iti Wadi et-Teim wenno iti maysa a disso iti asideg dayta.