HALAC, BANTAY

[Napalanas a Bantay].

Bantay a nagserbi kas tanda ti makin-abagatan a geograpiko a nagpatinggaan ti panagparmek ti Israel iti Naikari a Daga iti sidong ti panangidaulo ni Josue. (Jos 11:16, 17; 12:7) Kaaduanna a maikunkuna a ti Halac isu ti Jebel Halaq (Har He-Halaq), ti maudi a makinlaud a nangato a lugar iti Palestina iti dalan manipud Beer-seba nga agturong iti Araba. Dayta a kabambantayan a mangrugi iti Jebel Halaq bingayenna ti pagpaaraban iti daya ken ti nadarat a desierto iti laud. No umiso ti naikuna a deskripsion, ti panangiladawan ti Biblia iti Halac kas “sumang-at,” wenno ‘agpangato,’ iti Seir ket kaipapananna a nakasango ti Seir ti akaba a sikigan daytoy a bantay, nga aglayon manipud abagatan a laud agingga iti amianan a daya.