BAAL-SALISA

[Makinkukua iti Salisa].

Lugar a nangigapuan ti maysa a lalaki iti 20 a tinapay a sebada ti umuna a bungbunga ti apitna ken sumagmamano a naata a bukbukel nga idatagna ken mammadto Eliseo. (2Ar 4:42-44) Tiempo idi ti nakaro a bisin, ket adda ni Eliseo idiay Gilgal. Ti bassit laeng nga abasto ket nakaanay iti sangagasut nga “annak dagiti mammadto” sadiay, nga adda pay natedda.​—2Ar 4:38, 43; idiligyo ti Mt 14:20; Mr 8:8.

Ti Baal-salisa ket maipagpagarup nga adda iti asideg ti Gilgal ken nalabit “iti daga ti Salisa,” a limmasatan ni Saul idi birbirokenna dagiti asna ni amana. (1Sm 9:4) Ti Baal-salisa ket natukoy iti Talmud ti Babilonia nga inladawanna dayta kas lugar a sadiay nakasapsapa a maluom dagiti prutas. (Sanhedrin 12a) Naikuna nga adda dayta iti Kafr Thulth iti katurturodan ti Efraim, yantangay ti nagan a Thulth ket Arabiko nga eksakto a katupag ti Hebreo a Salisa. Ti Kafr Thulth ket masarakan iti agarup 46 km (29 mi) iti amianan nga amianan-a-laud ti Jerusalem.