Dagiti Kabalio ken Umap-apuy a Karuahe ni Jehova

Gubgubaten ni Ben-hadad nga ari ti Siria ti Israel. Ngem kada aramidenna dayta, pakaammuan ni propeta Eliseo ti ari ti Israel isu a kanayon a makalibas. Gapuna, implano ni Ben-hadad a tiliwen ni Eliseo. Naammuanna nga adda ni Eliseo iti siudad ti Dotan isu nga imbaonna sadiay dagiti soldado ti Siria tapno tiliwenda.

Napan dagiti soldado idiay Dotan iti rabii. Kabigatanna, rimmuar ti adipen ni Eliseo ket nakitana a napalawlawan ti siudad iti nakaad-adu a soldado. Nagbuteng ket impukkawna: ‘Eliseo, ania ti aramidentayo?’ Kinuna ni Eliseo: ‘Ad-adu ti kakaduata ngem iti kakaduada.’ Idi kuan, impakita ni Jehova iti adipen ni Eliseo a dagiti bantay iti aglawlaw ti siudad ket napno kadagiti kabalio ken umap-apuy a karuahe a pakigubat.

Idi tiliwenen dagiti soldado ti Siria ni Eliseo, inkararagna: ‘Jehova, pangngaasim, bulsekem ida.’ Bigla a saanen nga ammo dagiti soldado ti ayanda uray no makakitada. Imbaga ni Eliseo kadagiti soldado: ‘Sabali ti siudad a napananyo. Surotendak ket ipankayo iti lalaki a birbirokenyo.’ Sinurotda ni Eliseo ket nakadanonda idiay Samaria, a paggigianan ti ari ti Israel.

Idi addan dagiti soldado idiay Samaria, nabigbigda no sadinon ti ayanda. Insaludsod ti ari ti Israel ken Eliseo: ‘Patayek kadi ida?’ Pinanunot kadi ni Eliseo a tsansana daytoyen tapno makabales kadagiti mayat a mangtiliw kenkuana? Saan. Imbaga ni Eliseo: ‘Dimo patayen ida. Pakanem ida sa pagawidem.’ Isu a nangisagana ti ari iti adu a makan sa pinagawidna ida.