BET-SITTA

[Balay ti [Kayo nga] Akasia].

Ili a nadakamat iti pannakailadawan ti nagturongan dagiti Midianita idi nagtalawda gapu ta winarawara ida ni Ukom Gideon iti Nababa a Tanap ti Jezrael. (Uk 7:22) Yantangay dagiti Midianita agturturongda idi iti rehion ti Jordan, ti Bet-sitta ket mabalin nga adda iti daya wenno iti abagatan a daya ti turod ti More ken ti bubon ti Harod, nga iti asideg dagitoy ti naggugubatanda. (Uk 7:1) Kunaen ti dadduma a ti Shattah (Bet Ha-Shitta), agarup 4.5 km (3 mi) iti daya nga abagatan-a-daya ti agdama nga ʽEn Harod, ket mabalin nga isu ti ayan ti Bet-sitta ken patalgedanna ti orihinal a nagan. Sigun iti dadduma, asideg unay dayta iti nakapasamakan ti gubat isu nga ipapanda a maysa dayta a lugar nga adda iti naab-abagatan a daya, nupay awan ti espesipiko a disso a tuktukoyenda.