MORE

1. Nalabit idi tiempo ni Abraham, ti dadakkel a kayo ti More ket nagbalinda a nalatak a pagilasinan iti asideg ti Siquem ken kasla nagtultuloy a kasta agingga kadagiti simmaganad a siglo. (Ge 12:6; De 11:30; nalabit naiparipirip met iti Ge 35:4; Jos 24:25, 26; Uk 9:6.) Inanaig ti dadduma nga eskolar ti “dakkel a kayo ti Meonenim” iti “dadakkel a kayo ti More.” (Uk 9:37) Nalabit “More” ti nagan ti sigud a makinkukua iti disso iti asideg ti Siquem nga addaan iti maysa a kayo a nakalatlatak wenno addaan iti muyong wenno rimmuok ti dadakkel a kayo.

2. Ti nagan ti maysa a turod, a sadiay ti nangparmekan ni Gideon kadagiti Midianita. (Uk 7:1) Kadawyan a maipagpagarup a daytoy a turod isu ti nalayang a maris-dapo a pantok ti Jebel Dahi (Givʽat Ha-More), agarup 8 km (5 mi) iti amianan ti maikunkuna nga ayan ti bubon ti Harod.