BEZEC

1. Ti disso a nangparmekan ti Juda ken Simeon iti 10,000 a buyot dagiti Canaanita ken Perizeo iti sidong ni Adoni-bezec. (Uk 1:3-7) Ti sumagmamano inaigda daytoy a Bezec iti nadakamat iti 1 Samuel 11:8 (Num. 2), nga adda iti kaamiananan a disso no mainaig iti Jerusalem ken iti teritoria a sinakup ti Juda ken Simeon. No pudno daytoy a pannakaawat, kaipapananna a nagpaabagatan ni Adoni-bezec tapno makikappon iti dadduma pay a puersa dagiti Canaanita ngem sinabet ti Juda ken Simeon, kinamatda a nagpaamianan nga agturong iti Bezec, ket sadiay a naabak. Nupay kasta, ti konteksto agparang nga ipasimudaagna ti maysa a disso iti aglawlaw ti Jerusalem. Maigapu kadagitoy a kasasaad, ti Bezec, ti siudad ni Adoni-bezec, ket maikunkuna nga adda iti rehion ti Sefela iti disso ti Khirbet Bezqa, agarup 5 km (3 mi) iti amianan a daya ti Gezer, nupay saan a sigurado dayta.

2. Ti lugar a nangummongan ni Saul iti annak ti Israel ken Juda tapno makirupakda kadagiti Ammonita a nagpakarso maibusor iti Jabes idiay Galaad. (1Sm 11:8-11) Ti kinapudno a daytoy a lugar agpatnag laeng a panagmartsa manipud Jabes pasingkedanna ti panangmatmat nga adda dayta iti agdama a disso ti Khirbet Ibziq, 21 km (13 mi) iti amianan a daya ti Siquem. Iti laud ti Khirbet Ibziq, adda bantay a 713 m (2,339 pie) ti katayagna iti ngatuen ti patar ti baybay ken mabalin a nagpaay kas maitutop a lugar a pangummongan ni Saul kadagiti puersana.