BOAZ, I

[mabalin nga, Iti Pigsa].

Maysa nga agtagtagikua iti daga iti Betlehem idiay Juda, “lalaki a mannakabalin iti kinabaknang” idi agarup maika-14 a siglo K.K.P. (Ru 2:1) Ni Boaz ket anak da Salma (Salmon) ken Rahab, ken isu ti ama ni Obed. (Mt 1:5) Isu ket nagbalin a paset ti linia ti kapuonan ti Mesias, ti maikapito a kaputotan manipud ken Juda. (1Cr 2:3-11; Lu 3:32, 33) Naitalimeng maipaay kadatayo iti libro ti Ruth ti salaysay no kasano a naaramid daytoy naidumduma unay a panagbalbaliw ti paspasamak, a nakaigapuan ti pannakairaman ni Boaz iti kapuonan ni Jesus.

Addaan ni Boaz iti asideg a kabagian nga agnagan Elimelec, a daytoy ket natay ken uray met ti dua nga annakna a lallaki, iti kasta saan a nakaibati iti annak nga agtawid. Ni Ruth a maysa kadagiti naibalo ti dua nga annak, ket nagtalinaed a kadua iti naibalo ni Elimelec a ni Noemi. Tiempo idi ti panagani, ket “naiparna” nga iti talon a kukua ni Boaz ti nagadasan ni Ruth. (Ru 2:3) Kabayatanna, ni Boaz ket pudpudno a Judeano, napasnek a managdaydayaw ken Jehova. Saanna laeng a kinablaawan dagiti managanina iti “adda koma kadakayo ni Jehova,” no di ket, idi napaliiwna ti kinasungdo ni Ruth maipaay ken Noemi, kinunana met kenkuana, “Gunggonaan koma ni Jehova ti wagas a panagtignaymo, ket adda koma naan-anay a tangdan nga agpaay kenka manipud ken Jehova.” (Ru 2:4, 12) Idi impadamag ni Ruth dagitoy a bambanag iti katuganganna, inyebkas ni Noemi: “Isu bendituen koma ni Jehova . . . [Isu] maysa kadagiti manangsakatayo.” (Ru 2:20) Kanayonanna pay, ni Noemi inlawlawagna ken Ruth ti nakayugalian a pamay-an no kasano nga ibaga ken Boaz ti maipapan iti daytoy a banag idi nalpasen ti panagani. Bayat a matmaturog ni Boaz iti pagirikanna, nariinganna ni Ruth a nakaidda kadagiti nalukaisan a sakana, a dinawatna a sakaen ni Boaz ti sanikua ni Elimelec babaen ti panagasawa dagiti agkayong. (Kitaenyo ti AGKAYONG A PANNAKIASAWA.) Ni Ruth ti agbalin a sandi ni Noemi, a saanen a mabalin nga aganak gapu ta baketen. Iti sumuno a bigat saanen a nagtaktak ket pinaayaban ni Boaz ti maysa pay nga as-asideg a kabagian, ngem daytoy a tao, a tinukoy laeng ti Biblia a Kastoy-a-kua, nagkedked a mangannurot iti daytoy nga urnos ti Dios. Nupay kasta, dagus nga inaramid dayta ni Boaz ket innalana ni Ruth kas asawana, nga addaan pamendision dagiti umili. Nangipasngay kenkuana iti anak a lalaki a pinanagananna iti Obed, ti apong ni Ari David.​—Ru 3:1–4:17.

Iti intero a salaysay, manipud iti immuna a naayat a panangkablaawna kadagiti trabahador agingga iti panangawatna iti rebbengen a panangtaginayon iti nagan ti pamilia ni Elimelec, mapaliiw a naisangsangayan a tao ni Boaz​—maysa a tao a nasiglat ken addaan autoridad nupay kasta addaan iti nasayaat a panagteppel, pammati, ken kinatarnaw, a naparabur ken naasi, nadalus iti moral, ken naan-anay a natulnog iti bilbilin ni Jehova iti amin a bambanag.