KAPITAN ITI TEMPLO

Ti opisial, maikadua iti dignidad iti nangato a padi (Ara 4:1), a mangay-aywan iti agan-annong a kinapadi ken kadagiti Levita a naorganisar iti sidong dagiti nababbaba a kapitan tapno bantayanda ti templo idiay Jerusalem ken tapno pagtalinaedenda ti urnos. (Lu 22:4, 52) Adda 24 a benneg dagiti Levita, a dagita a benneg agrikus ti panagsisinnublatda nga agserbi iti makalawas kada batang, mamindua iti makatawen. Tunggal benneg nalabit addaan met iti kapitan a mangaywan iti dayta, agraman sumagmamano a kapitan ti babbabassit a bunggoy.

Dagiti kapitan ket naimpluensia a lallaki. Nakikumplotda iti panguluen a papadi iti panangtangdan ken Judas tapno liputanna ni Jesus. Inkuyogda dagiti buyotda agraman ti papadi tapno arestuenda ni Jesus. (Lu 22:3, 4, 52) Ti kapitan ti templo ti timmulong a namagparang nga autorisado ti pannakaaresto da Pedro ken Juan idiay templo. (Ara 4:1, 3) Iti naud-udi a pasamak, kalpasan a ni Pedro ken ti sumagmamano kadagiti apostol naluk-atanda iti pagbaludan babaen ti maysa nga anghel, ti kapitan iti templo napan agraman dagiti opisialna tapno iyegda ida iti sanguanan ti Sanhedrin iti kasla legal a pamay-an nga awanan iti kinaranggas.​—Ara 5:24-26.