Iti Lamisaan ti Kapitan
MAKAPAINTERES a tattao, agkakaimas a taraon, ken makaparagsak a panagsasarita. Dagita ti mangparagsak iti pannakipangan iti lamisaan ti kapitan ti barko kabayatan ti panagbiahe. Ngem ti panagsasarita iti lamisaan ni Captain Robert G. Smith iti White Star Line ket maysa a naespirituan a padaya.—Isaias 25:6.
Idi 1894, idi agtawen ni Robert iti 24, indauluanna ti panaglayag ti barko a Kinclune of Dundee kas damo a panangrikusna iti lubong. Di nagbayag, indauluanna dagiti barko ti White Star, a kas ti Cedric, Cevic, ken ti Runic.a Kabayatan ti panaglayagna iti Atlantico manipud New York agingga idiay Liverpool, Inglatera, iti maysa kadagitoy a barko, sinangaili ni Robert ni Charles Taze Russell iti lamisaan ti kapitan. Ti pannakisaritana ken Russell ti nangtukay iti interes ni Robert iti mensahe ti Biblia. Ket tapno ad-adu pay ti maammuanna, siraragsak nga innalana dagiti inted ni Russell a libro nga Studies in the Scriptures.
Nagtultuloy ti panagsurat ni Russell kenkuana, isu nga ad-adda a naginteres ni Robert iti mensahe ti Biblia. Imburay ni Robert iti asawana dagiti baro a banag a naammuanna. Di nagbayag, agpadadan nga aktibo nga Estudiante ti Biblia, kas pangawag idi kadagiti Saksi ni Jehova. Idi agangay naaddaan ni Robert iti pribilehio a mangipaay kadagiti palawag iti Biblia. Kas pagarigan, impalawagna idiay Brisbane, Australia ti tema a “Ti Balsamo Idiay Gilead” ket impakitana no kasano a naglaon ti Sao ti Dios iti mensahe a “pangrisut iti amin a parikut ditoy daga.” Idiay Inglatera, timmulong ti asawana ken dagiti ubbing pay nga annakda a nangipabuya iti “Photo-Drama of Creation.” Isuda ti mangipatokar iti nairekord a komentario ni Russell bayat a maipabpabuya dagiti slide.
Impatawid ni Robert kadagiti annakna ti inawatna a kinapudno mainaig iti Pagarian. Ita, kalpasan ti lima a henerasion, 18 a miembro ti pamiliana ti okupado a mangikaskasaba iti naimbag a damag ken napalalo ti panagyamanda gapu kadagiti naidasar iti lamisaan ti kapitan.
Babaen kadagiti publikasionda ken ti panangisursuroda iti Biblia, tultulongan dagiti Saksi ni Jehova dagiti tattao iti intero a lubong a mangammo iti mensahe ti Biblia a naginteresan ni Captain Smith. Uray sika mabalinmo met nga ammuen no ania daydiay makapainteres unay iti lamisaan ti kapitan.
[Footnote]
a Ti Titanic, a maysa met kadagiti barko ti White Star, ket indauluan ni Captain E. J. Smith (saan a kapin-ano ni Robert) kabayatan ti damo a panagbiahena a nagtungpal iti didigra.
[Ladawan iti panid 8]
Ni Robert G. Smith
[Ladawan iti panid 8]
Ni Charles T. Russell