KERETEO, DAGITI
Ti nagan ti maysa a grupo ti tattao a nainaig kadagiti Filisteo. (Eze 25:16; Sof 2:5) Sumagmamano a Kereteo ti nagserbi iti puersa militar ti nasion a pinili ni Jehova.—2Sm 8:18; 20:23; 1Cr 18:17.
Sigun iti sumagmamano a leksikograpo iti Hebreo a pagsasao, ti kere·thimʹ ket nagtaud iti sao a ka·rathʹ (kaipapananna ti “gessaten”) ket rebbeng a maipatarus a “manangdusa.” Nupay kasta, ti kaaduan a komentarista ti Biblia ibilangda a ti Hebreo a termino maipaay iti “Kereteo” (kere·thimʹ) ket tumukoy iti nasionalidad. Ngem bigbigenda a ti ka·rathʹ mabalin nga isu ti umiso a nagtaudan ti sao a kere·thimʹ. Kasta met, kunaenda nga iti Ezequiel 25:16 mabalin a nagaramat ni Jehova iti agkaarngi ti unina a sasao a makaawis iti atension idi inkarina, “Gessatekto [hikh·rat·tiʹ] dagiti Kereteo [kere·thimʹ],” wenno, iti anagna, ‘Papatayek dagiti manangpapatay.’
Ti nasinged a relasion iti nagbaetan dagiti Kereteo ken dagiti Filisteo ket agparang nga ipasimudaag ti agpada a pannakadakamat dagitoy a tattao iti Ezequiel 25:15-17 ken Sofonias 2:5-7. Ti Griego a Septuagint ilanadna kadagitoy a bersikulo ti patarus a “Kereteo” imbes a ti termino a “Cretano,” nalabit tapno inaigna dagita kadagiti Filisteo a rimmuar “manipud Creta [Caftor].” (Am 9:7) Gapu itoy ken ti nalawag a pannakainaig dagiti Kereteo iti “daga dagiti Filisteo” iti 1 Samuel 30:14, 16, ikeddeng ti kaaduan nga eskolar a dagiti Kereteo ket isu met laeng dagiti Filisteo wenno mabalin nga asideg ti panagkanaig dagitoy a tattao. Kunaen ti dadduma a dagiti Kereteo ket mabalin a maysa a kangrunaan a tribu dagiti Filisteo.
Kastoy ti maysa a singasing: Nupay sigud a nagduma dagitoy a grupo ti tattao, mabalin a nabilbileg dagiti Filisteo ngem kadagiti Kereteo wenno immun-unada a dimteng iti Canaan ket ngarud dinominaranda dayta a lugar idi agangay, nga inyawagda ti naganda iti benneg ti daga a naawagan Filistia, nupay saan a naan-anay a nagpukaw ti nagan a Kereteo. Sigun iti daytoy a singasing, dagiti padto da Ezequiel ken Sofonias a naisitar iti ngato mabalin a kaipapananda nga ipagteng ni Jehova ti pammales ken napalalo a ladingit iti amin nga agnanaed kadagiti siudad ti Filistia, agpadpada kadagiti Filisteo ken kadagiti Kereteo, a dagitoy a padto ket nalawag nga intungpal dagiti taga Babilonia.
Sumagmamano a Kereteo ti nagbalin a karaman kadagiti armado a puersa ni David, ket isuda ken dagiti Peleteo (masansan a kaduada a nadakamat) mabalin a nagserbida kas guardia ti ari iti sidong ti panangidaulo ni Benaias. (2Sm 8:18; 20:23; 1Cr 18:17; idiligyo ti 2Sm 23:22, 23; 1Cr 11:25.) Maigapu itoy, dagiti eskolar masansan nga inaigda dagiti Kereteo kadagiti “Cariano a para-guardia” idi panawen ni Jehoiada a padi, nasurok a 100 a tawen kalpasanna. (2Ar 11:4, 19; kitaenyo ti CARIANO A PARA-GUARDIA.) Nupay nalawag a ganggannaetda, dagiti Kereteo idi kaaldawan ni David ket saan a matangtangdanan laeng a soldado, nga agtignay gapu laeng iti personal a gunggona (kas masansan a di siuumiso nga ibagbaga ti dadduma), no di ket pudpudno a nasungdoda ken David kas pinulotan ni Jehova. Naan-anay nga imparangarang daytoy iti simamatalek nga idadasigda ken David idi napilitan a pumanaw iti Jerusalem agsipud ta “ti puso dagiti tattao ti Israel” kimmanunong ken rebelde nga Absalom. (2Sm 15:13, 18) Umasping iti dayta, dagiti Kereteo situtulnogda a timmulong idi agangay iti panangparukma iti iyaalsa ni Sheba a Benjamita, ken sinuportaranda ni Solomon a pinili ni David a sunona nga agturay iti Israel.—2Sm 20:7; 1Ar 1:38, 39, 44.