PELETEO, DAGITI

Dagiti nasungdo a mannakigubat ni Ari David; kanayon a nadakamatda a kadua dagiti Kereteo. Idi nagtalaw ni David manipud Jerusalem gapu iti panagrebelde ni Absalom (a sinuportaran ti kangrunaan a paset ti buyot), kimmuyog dagiti Peleteo iti panagballasiw ni David iti Kidron. (2Sm 15:18, 23) Timmulongda met a nangpasardeng iti panagrebelde ni Sheba (2Sm 20:7), ket idi agangay sinuportaranda ti panangpili ni David ken Solomon kas sunona, imbes a dumasigda ken Adonias kas inaramid ni Joab. (1Ar 1:38, 44) Dagiti Kereteo ken dagiti Peleteo ket saan a karaman iti buyot nga idadauluan ni Joab no di ket naisinada a grupo nga agserserbi ken Ari David. Ni Benaias idi ti panguluen dagiti Kereteo ken dagiti Peleteo. (2Sm 8:18; 20:23; 1Cr 18:17) Yantangay saan a nadakamat dagiti Peleteo sakbay wenno kalpasan ti panagturay ni David, mabalin a maikuna a bukodna ida nga adipen, saan ket a maysa a permanente a grupo nga agserserbi iti ari.​—Idiligyo ti 2Sm 8:18 ken 23:22, 23.

Yantangay saan a nalawag ti kinasiasino dagiti Peleteo timmaud ti adu a panangipapan, a karaman kadagita ti dua a kangrunaan a teoria: (1) Naikuna nga agpada ti nagtaudanda wenno nalabit dagiti Peleteo ket maysa a sanga dagiti Filisteo gapu ta ti nagan a Peleteo ken Filisteo ket agkaasping unay iti Hebreo (פלתי [Peleteo], a ti פלשתי [Filisteo] nanayonan iti maysa laeng a letra). Adda dagiti saan nga umanamong iti daytoy a panangipapan a dagiti Filisteo ti mangbukel iti bukod a para-guardia ni David, ngem saan koma a laksiden a mamimpinsan daytoy a posibilidad. (2) Iti sabali a bangir, dagiti nagan a Kereteo ken Peleteo ket nalabit termino a mangipasimudaag iti annongen wenno saad ti panagserbi dagiti para-guardia ni David, a dagiti Kereteo ti nagserbi a manangdusa ken dagiti Peleteo met ti tumataray. Ti kasta a benneg dagiti tumataray ket nadakamat bayat ti panagturay ni Saul ken ti naud-udi nga ar-ari. (1Sm 22:17; 2Ar 11:4; 2Cr 30:6) Nupay kasta, manmano laeng ti umanamong iti daytoy maikadua a panangmatmat.