KISLEV

Ti nagan ti maikasiam a lunar a bulan dagiti Judio kalpasan ti pannakaidestiero. Kaibatoganna ti maud-udi a paset ti Nobiembre agingga iti umun-una a paset ti Disiembre. (Ne 1:1; Jer 36:9; Zac 7:1) Katupagna ti maikatlo a bulan iti sekular a kalendario.

Daytoy a bulan ket panawen ti lam-ek, bulan ti lamiis ken panagtutudo. Gapuna mabasatayo a “situtugaw idi [ni Ari Jehoiaquim] iti balay a pagnaedan iti kalam-ekna, iti maikasiam a bulan, nga adda paginuduan a sumsumged iti sanguananna.” (Jer 36:22) Kalpasan ti pannakaidestiero, dagiti umili a naguurnong idiay Jerusalem maipaay iti gimong nga imbilin ti padi a ni Esdras a mangrugi iti maika-20 nga aldaw daytoy a bulan “nagtalinaedda a situtugaw iti nalayang a lugar ti balay ti pudno a Dios, nga agtigtigergerda gapu iti dayta a banag ken maigapu kadagiti dumayasadas a tudo.”​—Esd 10:9, 13.

Ti Piesta ti Dedikasion, a naangay iti panawen ti lam-ek idiay Jerusalem, ket nadakamat iti Juan 10:22. Kas naipakita iti Apokripa a libro ti 1 Macabeo (4:52-59), daytoy walo-aldaw a piesta ket inyussuat ni Judas Macabeo idi maika-25 nga aldaw ti Kislev iti tawen 165 K.K.P. kas panglaglagip iti pannakaidedikar manen ti templo idiay Jerusalem. Pagaammo ita daytoy a piesta kas Hanukkah.​—Kitaenyo ti PIESTA TI DEDIKASION.