KASINSIN

Ti anak ti ikit wenno uliteg ti maysa a tao. Ti kakaisuna a nagparangan ti Griego a sao nga a·ne·psi·osʹ (kasinsin) ket iti Colosas 4:10, a sadiay ni Pablo awaganna ni Marcos kas “kasinsin ni Bernabe.” Ti Griego a termino kangrunaan a kaipapananna ti “kasinsin a mismo,” ngem iti nalawlawa a kaipapanan, uray ti kapidua wenno kapitlo. Ti a·ne·psi·osʹ agparang met iti Septuagint iti Numeros 36:11 (pangadu a porma), ngem ti Hebreo a sasao iti Masoretiko a teksto literal a naipatarus nga “annak ti kakabsat ni amada.”

Ti King James Version awaganna ni Elisabet kas kasinsin (syg·ge·nisʹ) ni Maria iti Lucas 1:36. Daytoy a Griego a sao naibilang a naidumduma a porma ti sao a syg·ge·nesʹ, a naipatarus a ‘kabagian’ kadagiti moderno a bersion. (Lu 2:44; 21:16; Ara 10:24; CC, ED, NW) Maminlima nga agparang ti syg·ge·nesʹ iti Septuagint, a kaipapananna manen ti “kakabagian” iti pangkaaduan imbes a ti agdama a nakedngan nga awag a “kasinsin.”​—Le 18:14; 20:20; 25:45; 2Sm 3:39; Eze 22:6; LXX.

Nupay awan masarakan a sao maipaay iti kasinsin iti Hebreo a Kasuratan, naipatuldo sadiay daytoy a relasion babaen iti sasao a kas iti “annak ni . . . uliteg ni Aaron,” “anak ti ulitegna.” (Le 10:4; 25:49) Adda dagiti naipadamag a pannakiasawa kadagiti kasinsin: da Jacob ken Raquel, ken ti annak a babbai ni Zelofehad. (Ge 28:2; 29:10-12; Nu 36:11) Ti kakasta a pannakiasawa kadagiti kasinsin saan a nairaman kadagiti Mosaiko a panangiparit maibusor iti insesto. (Le 18:8-16) Itatta, nagduduma ti sibil a linlinteg iti daytoy a banag; ti sumagmamano nga estado ken nasnasion ipalubosda nga agasawa dagiti agkasinsin, iparit ti dadduma dayta.