CUSAN-RISATAIM

[mabalin a, Cusita (Etiope) iti Napamindua a Kinadangkes].

Ari ti Mesopotamia, a manipud iti panangiturayna winayawayaan ni Otniel dagiti Israelita kalpasan ti walo a tawen a pannakaadipenda. Naawagan met iti “ari ti Siria.” (Uk 3:7-11) Ti kagudua (“risataim”) daytoy ragup a nagan matmatan ti sumagmamano kas nagan ti maysa a lugar wenno rehion, idinto ta ipatarus ti dadduma a kaipapananna ti “Napamindua a Kinadangkes.” Nausar ti “Cusan” iti Habakuk 3:7 a kapada ti Midian; nupay kasta, nadakamat a ni Ari Cusan-risataim ket naggapu iti Mesopotamia (Heb., ʼAramʹ na·haraʹyim; idiligyo ti Ge 24:10, a nakausaran ti isu met laeng a termino a pangdeskribir iti ayan ti siudad ni Nacor idiay Siria). Dakamaten ti maysa a listaan ni Faraon Ramses III ti maysa a distrito idiay makin-amianan a Siria a naawagan iti Qusanaruma, ket kas insingasing ti sumagmamano nga eskolar, mabalin a daytoy idi ti sentro ti pagturayan daytoy nga ari. Ni Cusan-risataim ti immuna a kangrunaan a nangirurumen iti Israel bayat ti periodo ti Uk-ukom.