ANAK A BABAI, ANAK

Kaputotan a babai; iti Hebreo, bath, ket iti Griego, thy·gaʹter. (Ge 5:4; Mt 14:6; Ara 21:9) Kadagidi tiempo ti Biblia, ti pannakaipasngay ti annak a babbai iti sangakabbalayan ket saan a kas karagsak ti pannakayanak ti annak a lallaki; naibilang a nababbaba ti saadda no idilig iti saad ti ubbing a lallaki, ket masansan a saan a nailanad dagiti naganda. (1Cr 2:34, 35) Kaskasdi a ti kaaduan a nagannak dinungdungngoda unay ti annakda a babbai ken sinaluadanda dagiti pagsayaatanda. Idi bimmallaet dagiti agledleddaang a nagannak, pinaimbag ni Jesus ti anak a babai ti maysa a babai a taga Fenicia, ket ti anak a babai ni Jairo imbangonna manipud kadagiti natay.​—Mt 15:22-28; Lu 8:41, 42, 49-56.

Iti kagimongan dagiti patriarka, adda sumagmamano a kalintegan, rebbengen, ken kasta met limitasion ti annak a babbai. Naitudingda iti nadumaduma nga annongen. Ti annak a babbai ti papadi nanganda manipud kadagiti bingay ti papadi kadagiti sakripisio. (Ge 24:16, 19, 20; 29:6-9; Le 10:14) Ti anak a babai ket sanikua ti amana agingga nga itedna iti pannakiasawa (Jos 15:16, 17; 1Sm 18:17, 19, 27), ket kas sanikua mabalin nga isu maaramat pay kas tani wenno mailako iti pannakaadipen, nupay saan nga iti ganggannaet. (Ex 21:7-10; Ne 5:2-5) Agingga a saan pay a naasawaan, dagiti karina mabalin a waswasen ni amana. (Nu 30:3-5) Saan a maitunos iti linteg nga isu pagbalangkantisen ti ama, ket no isu napilit a makidenna, ti ama mabalinna ti agsingir kadagiti danios. (Ex 22:16, 17; Le 19:29; De 22:28, 29) Adda dagiti gundaway a ti amma intukonda ti birhen nga annakda a babbai kadagiti rinuker a bunggoy dagiti agderderraaw tapno masalakniban dagiti sangailida. (Ge 19:6-8; Uk 19:22-24) No dadduma, ti annak a babbai naikkan iti tawid a mairaman iti kakabsatda a lallaki, ngem iti kaso ti lima nga annak a babbai ni Zelofehad a ti amada natay nga awanan annak a lallaki, inawatda ti intero a tawid dagidi ammada, no la ket ta makiasawada iti annak a lallaki ni Manases tapno ti sanikua agtalinaed iti isu met laeng a tribu. (Nu 36:1-12; Jos 15:19; Job 42:15) No naidiborsio wenno nabalo ti anak a babai, mabalinna ti agsubli iti sangakabbalayan ni amana.​—Ge 38:11; Le 22:13.

“Anak a babai”—kanayon kadi a maibilang kas ti mismo a putot a babai?

Nupay ti termino nga “anak a babai” tumukoy iti mismo a putot ti maysa a tao, nayaplikar met dayta iti sabsabali pay a relasion. Kas pagarigan, iti sidong ti sumagmamano a kasasaad, ti termino tumukoy idi iti kabsat a babai (Ge 34:8, 17), naampon nga anak a babai (Est 2:7, 15), manugang-a-babai (Uk 12:9; Ru 1:11-13), apoko a babai (1Ar 15:2, 10, a sadiay ti Hebreo a sao maipaay iti anak a babai, bath, naipatarus nga “apoko a babai” iti Mo, NW; kitaenyo ti 2Cr 13:1, 2), ken kaputotan.​—Ge 27:46; Lu 1:5; 13:16.

Malaksid kadagitoy a direkta a kabagian, ti termino nga “anak a babai” nayaplikar iti babbai iti pangkaaduan (Ge 6:2, 4; 30:13; Pr 31:29); babbai iti maysa a daga, ili wenno siudad (Ge 24:37; Uk 11:40; 21:21); ken babbai a managdaydayaw iti ulbod a didios (Mal 2:11). Naaramat dayta kas gagangay a naasi nga awag ti maysa a tao nga addaan autoridad wenno ti maysa a laklakay a tao iti ub-ubing a babai. (Ru 3:10, 11; Mr 5:34) Dagiti porma ti sao a bath maar-aramat met no matuktukoy dagiti ‘sanga’ ti maysa a kayo (Ge 49:22) ken dagiti ‘agpampannuray nga ili’ ti dakdakkel a siudad. (Nu 21:25; Jos 17:11; Jer 49:2) Ti termino maipaay iti “anak a babai,” iti adu a kaipapananna, agparang iti nasurok nga 600 a daras iti Biblia.