DEMETRIO
[Ken (Kukua ni) Demeter [Griego a diosa ti panagtalon]].
1. Agpampanday iti pirak iti siudad ti Efeso idiay Asia Menor. Sinulbogna ti maysa a derraaw maibusor ken apostol Pablo ken kadagiti kaduana iti pagnguduan ti panagyan ni Pablo iti nagbaetan ti dua ken tallo a tawen idiay Efeso (a. 53-55 K.P.), kabayatan ti maikatlo a panagbaniagana kas misionero. Ti panangaskasaba ni Pablo ket nabendisionan iti balligi, ta adu ti nangtallikud iti panagsalamangka ket pinuoranda dagiti libroda. Addaan idi ni Demetrio iti narang-ay a negosio a panagaramid kadagiti pirak a sinantemplo ti diosa a ni Artemis. Yantangay madanagan a mapukawan iti sapul gapu iti balligi ni Pablo iti panagaramid ad-adalan ni Kristo, ginutugotna dagiti nasigo a managtrabaho ken dadduma pay. Buyogen ti nagkadua nga argumento a buklen ti pangta a pannakapukaw ti negosio ken ti peggad nga agbalin nga awan pategna ti templo ni Artemis, nagballigi ni Demetrio a nangriribuk iti intero a siudad.
Kalpasan ti agarup dua nga oras, ti managilista iti siudad nabalinanna a pagtalnaen ti riribuk; impamatmatna a no ni Demetrio ken dagiti nasigo a managtrabaho addaanda iti pammabasol maibusor ken Pablo ken kadagiti kaduana, adda dagiti pangukoman a legal a mangtaming iti dayta a banag, ngem gapu iti daytoy nagulo a demostrasion, ti siudad pinagbalinda a manungsungbat iti pammabasol a panagalsa iti Romano a gobierno. Idin a nagtalna ti bunggoy, ket linuk-atanda dagiti katrabahuan ni Pablo ken pinanawanda ti teatro, ti nakaaramidan ti nakababain a derraaw. Di nagbayag kalpasan dayta, nagluas ni Pablo a mapan idiay Macedonia.—Ara 19:18, 19, 23-41; 20:1.
2. Maysa a Kristiano a nasayaat ti pannakadakamatna iti surat ni apostol Juan agpaay ken Gayo, idi agarup 98 K.P. Mabalin a ni Demetrio ti nangitulod iti surat ken Gayo. Ti panangirekomenda ni Juan ken Demetrio ket mabalin a tapno iparegtana ken Gayo ti kinamanagpadagus, ta agparang a kaugalian idi dagiti kongregasion ti tumulong a mangipaay iti taraon ken pagdagusan dagiti matalek a kakabsat a nagdaliasat maipagapu iti naimbag a damag.—3Jn 1, 12.