EBENEZER

[Bato ti Tulong].

1. Maysa a disso nga iti asidegna ti namindua a nakaabakan ti Israel iti im-ima dagiti Filisteo, a nagbanag saan laeng nga iti ipapatay ti 34,000 nga Israelita, a pakairamanan da Hofni ken Finehas, no di ket naagawda pay dagiti kabusor ti lakasa ti tulag. Ti damag maipapan iti pannakaagaw ti lakasa ti nakaigapuan ti ipapatay ni Eli a padi. (1Sm 4:1-11, 17, 18; 5:1) Nupay saanda a sigurado, kunaen dagiti eskolar a ti Ebenezer ket adda idiay Majdel Yaba, 4 km (2.5 mi) iti abagatan a daya ti Afek iti Tanap ti Saron (a nagpakarsuan dagiti Filisteo).

2. Ti nagan a nayawag iti maysa a bato nga impatakder ni Samuel nasurok a 20 a tawen kalpasan ti paspasamak a nadakamat iti immun-una a kapitulo, nalabit tapno panglaglagip iti panagballigi ti Israel maibusor kadagiti Filisteo babaen ti tulong ti Dios. (1Sm 7:2, 12) Nupay saan nga ammo ita ti eksakto nga ayanna, nalawag nga adda idi dayta iti sumagmamano a milia iti abagatan a daya ti Num. 1 iti ngato, “iti nagbaetan ti Mizpa ken Jesana.”