EKRON

Maysa a kangrunaan a siudad dagiti Filisteo, nalabit dayta ti kaamiananan a sentro a pagturturayan ti maysa kadagiti lima nga aliado nga appoda. (Jos 13:3) Saan a masigurado ti eksakto nga ayanna, ngem kadawyan a maikunkuna nga isu ti Khirbet el-Muqannaʽ (Tel Miqne), agarup 18 km (11 mi) iti daya ti Asdod. Iti nabiit pay a panagkabakab, natakuatan sadiay ti kadakkelan a siudad iti daydi a tiempo ket dayta ti makagapu no apay a mapili ita kas ayan ti Ekron.

Makita iti pakasaritaan ti Ekron a kanayon nga agbaliwbaliw ti nangituray iti dayta. Saan a karaman ti Ekron kadagiti pinarmek ni Josue. Ngem idi agangay, kinautibo dayta dagiti taga Juda. (Jos 13:2, 3; Uk 1:18) Iti damo a pannakabingbingay ti Naikari a Daga, masarakan ti Ekron iti beddeng ti nagbaetan ti Juda ken Dan nupay adda dayta iti las-ud ti tribu ni Juda. (Jos 15:1, 11, 45, 46; 19:40-43) Idi tiempo nga inagaw dagiti Filisteo ti lakasa ti tulag, naisublin ti Ekron iti ikutda. Ti kaadda ti Lakasa ti nakaigapuan ti “makapapatay a pannakariribuk” daytoy a siudad, ket manipud idiay Ekron naisubli idi agangay ti Lakasa kadagiti Judio. (1Sm 5:10-12; 6:16, 17) Kalpasan nga inturayan dayta ti Israel iti sabali pay a periodo, nalawag nga adda manen ti Ekron iti ikut dagiti Filisteo idi tiempo a ni David pinapatayna ni Goliat. (1Sm 7:14; 17:52) Iti nasapa a paset ti maikasangapulo a siglo K.K.P., kinuna ni Faraon Sisac ti Egipto a naalana ti Ekron. Agarup dua a siglo kalpasanna, sigun iti rekord ti pakasaritaan ni Senaquerib, ni Padi nga ari ti Ekron ket nasungdo kadagiti Asirio.