SUNGROD

Iti literal, “taraon” ti apuy. (Isa 9:5, 19; Eze 15:4) Ti uging (Pr 26:21; Jn 18:18), ruting (Jer 7:18), tanutubo (Job 41:20), siit (Ec 7:6), kayo (Jos 9:27; Isa 44:14-16), kasta met dagiti puon ti ubas (Eze 15:6), ket karaman kadagiti sungrod nga espesipiko a nadakamat iti Biblia. Kanayonanna pay, ti lana ti olibo ket segden a gagangay a nausar kadagiti pagsilawan. (Ex 27:20; Mt 25:3, 4) Mabalin a kayo, iti nainkasigudan a kasasaadna wenno kas uging, ti kangrunaan a pagsungrod dagiti Israelita. Maipaay a pagpapudot, gagangay a mapagbeggang ti uging iti maysa a paginuduan. (Jer 36:22) No dadduma met, mapabeggang dayta uray awan iti maysa a pagkargaan, kas iti mabalin a napasamak idi a ni Jesu-Kristo, kalpasan ti panagungarna, nangisagana iti pammigat iti rabaw ti dumardarang a beggang.​—Jn 21:9, 10; kitaenyo ti UGING, BEGGANG.

Tapno mailadawan ti kinakaro ti agbalin a kasasaad no nalakuben ti Jerusalem, naibilin ken Ezequiel nga agusar iti ibleng ti tao kas sungrod, ngem idi nagkedked, pinalubosan ni Jehova nga agusar laengen kadagiti tipkel ti ibleng ti baka. (Eze 4:8, 12-15) Nupay ti namaga nga ibleng ti bakbaka ti us-usaren ita ti sumagmamano a tattao iti Makintengnga a Daya gapu iti kinakirang ti kayo, saanna met kayat a sawen a daytoy idi ti kadawyan nga inusar dagiti Israelita, nangnangruna ta napuspuskol idi ti kakaykaywan iti kadaanan a Palestina ngem iti agdama.