HAGGEO
[[Nayanak iti] Piesta].
Maysa a Hebreo a mammadto idiay Juda ken Jerusalem idi tiempo a gobernador ni Zorobabel bayat ti panagturay ni Ari Dario Histaspis ti Persia.—Hag 1:1; 2:1, 10, 20; Esd 5:1, 2.
Patien ti Judio a tradision a ni Haggeo ket kameng ti Dakkel a Sinagoga. Naikuna a mabalin nga isu ket maysa a padi sigun iti Haggeo 2:10-19. Agparang ti naganda a dua ken mammadto Zacarias kadagiti superskripsion ti Salmo 111 (112) iti Latin a Vulgate; Salmo 125 ken 126 iti Syriac a Peshitta; Salmo 145 iti Griego a Septuagint, iti Peshitta, ken iti Vulgate; ken Salmo 146, 147, ken 148 iti Septuagint ken iti Peshitta. Mabalin a nayanak ni Haggeo idiay Babilonia ket nagsubli idiay Jerusalem a kadua ni Zorobabel ken dagiti natda a Judio idi 537 K.K.P. Ngem bassit laeng ti ammo maipapan a mismo ken Haggeo, ta saan nga ipalgak ti Kasuratan dagiti nagannak ti mammadto, ti tribuna, ken dadduma pay.
Ni Haggeo ti nagbalin a kaunaan a mammadto kalpasan ti pannakaidestiero ket duadan ken Zacarias kalpasan ti agarup dua a bulan. (Hag 1:1; Zac 1:1) Nagsardeng ti panagibangon iti templo gapu iti ibubusor dagiti kabusor ngem naibaybayag manen iti sumagmamano a tawen gapu iti kinaaleng-aleng dagiti Judio ken inaagum a panangsapsapulda kadagiti bukodda a pagimbagan. Pinarayray ni Haggeo ti regta dagiti nagsubli a Judio manipud pannakaidestiero tapno maitultuloyda ti panagibangon iti templo. (Esd 3:10-13; 4:1-24; Hag 1:4) Epektibo unay ti uppat a mensahe nga inted ti Dios tapno iwaragawag ni Haggeo bayat ti agarup uppat a bulan a periodo idi maikadua a tawen ni Dario Histaspis (520 K.K.P.) ken inlanad dagita ti mammadto iti libro ti Biblia a Haggeo, ta isu dayta ti damo a nangtignay kadagiti Judio tapno maituloyda manen ti trabahoda a panagibangon iti templo. (Hag 1:1; 2:1, 10, 20; kitaenyo ti HAGGEO, LIBRO TI.) Intultuloy da Haggeo ken Zacarias a pinarparegta dagiti Judio iti trabaho a panagibangon agingga a nairingpas ti templo idi arinunos ti maikanem a tawen ni Dario, idi 515 K.K.P.—Esd 5:1, 2; 6:14, 15.