INDIA

Saan a masinunuo ti ayan ti lugar a naawagan “India” iti Biblia. (Est 8:9) Kaaduanna nga isingasing dagiti eskolar a tumukoy dayta iti lugar a pagay-ayusan ti Karayan Indus ken dagiti gubuayan ti dandanumna, awan sabali, ti rehion ti Punjab ken nalabit kasta met ti Sind. Ti sasao ti historiador a ni Herodotus (III, 88, 94; IV, 44) ipasimudaagna a ti “India” immuna a nagbalin a paset ti Imperio ti Persia bayat ti panagturay ni Dario Histaspis (521-486 K.K.P.). Idi tiempo ni Asuero (naibilang nga isu ni Xerxes I, anak ni Dario Histaspis), ti India ti makindaya a pagpatinggaan ti imperio.​—Est 1:1.

Mabalin a napagyanan ti Ginget Indus di nagbayag kalpasan ti pannakariribuk ti pagsasao dagiti nangibangon iti Babel. No ti kadaanan a sibilisasion ti Ginget Indus idilig iti sibilisasion ti Mesopotamia mapaliiw nga adda dagiti naibangon a patakder a kas kadagiti ziggurat ti Mesopotamia, kitkitikit ti ladawan ti tao a ti ul-uloda addaan kadagiti kasla maskara a langa a kadawyan iti eskultura ti kadaanan a Mesopotamia, ken piktograpiko a simsimbolo a kaar-arngi dagiti adda iti nagkauna a Mesopotamia. Ti Asiriologo a ni Samuel N. Kramer insingasingna a ti Ginget Indus ket pinagnaedan dagiti tattao a nagtalaw manipud Mesopotamia idi inturayan dagiti Sumeriano dayta a lugar.