JOEL

[Ni Jehova ket Dios].

1. Kaputotan ni Isacar ken ulo ti pamilia iti tribuna.​—1Cr 7:1-4.

2. Kaputotan ti anak ni Levi a ni Cohat; “anak ni Azarias” ken inapo ti Num. 5.​—1Cr 6:36-38.

3. Maysa a Rubenita a ti kaputotanna a ni Beerah ket indestiero ni Ari Tilgat-pilneser (Tiglat-pileser III) ti Asiria.​—1Cr 5:3-10.

4. Maysa a panguluen dagiti Gadita nga agnanaed idiay Basan.​—1Cr 5:11, 12.

5. Ti inauna nga anak ni mammadto Samuel; kaputotan ti Num. 2 ken ama ni Heman a maysa a kumakanta a Levita. (1Cr 6:28, 33, 36; 15:17) Ni Joel ken ti in-inaudi a kabsatna a ni Abias ket dinutokan ni amada nga agbalin nga uk-ukom, ngem ti saanda a kinamapagtalkan iti saadda ti makagapu a nagkiddaw dagiti umili iti maysa nga ari a tao.​—1Sm 8:1-5.

Kunaen ti 1 Cronicas 6:28 iti Masoretiko a teksto (ken ti dadduma pay a patarus) a ni “Vashni” ti inauna nga anak ni Samuel. Nupay kasta, umanamong ti kaaduan nga eskolar a “Joel” ti adda iti orihinal a Hebreo, maysa a patarus a tinaginayon ti Syriac a Peshitta ken ti Lagardian nga edision ti Griego a Septuagint. (Idiligyo ti 1Sm 8:2.) Mabalin a di inggagara a naikkat a namimpinsan ti eskriba ti nagan a “Joel” gapu ta agkaasping ti “Joel” ken ti ngudo ti sarunuenna a sao iti teksto (“Samuel”). Kalpasanna, kasla napagkamalianna ti Hebreo a sao a wehash·she·niʹ (kaipapananna ti “ket ti maikadua [nga anak]”) kas nagan a “Vashni” sa nangipasngat iti letra a waw (ken) sakbay ti nagan nga Abias.

6. Maysa kadagiti nabileg a lallaki ni David; kabsat ni Natan.​—1Cr 11:26, 38.

7. Maysa a Gersonita a Levita iti balay ni Ladan; anak ni Jehiel(i). (1Cr 23:7, 8) Ni Joel a panguluen ken ti 130 kadagiti kakabsatna ket sinantipikarda ti bagbagida ken timmulongda a nangyeg iti lakasa ti tulag iti Jerusalem. (1Cr 15:4, 7, 11-14) Idi agangay, ni Joel ken ti kabsatna a ni Zetam ket nadutokan kas manangaywan kadagiti gameng ti santuario.​—1Cr 26:21, 22.

8. Maysa a prinsipe iti daydiay paset ti Manases iti laud ti Jordan, idi agturturay ni David; anak ni Pedaias.​—1Cr 27:20-22.

9. Maysa a mammadto ni Jehova ken mannurat iti libro ti Biblia a napanaganan iti naganna. Isu ket anak ni Petuel.​—Joe 1:1; kitaenyo ti JOEL, LIBRO TI.

10. Maysa a Cohatita a Levita; anak ni Azarias. Idi umuna a tawen ni Ezekias, timmulong ni Joel a napan nangibelleng idiay Ginget Kidron kadagiti narugit a banag nga inikkat ti papadi manipud templo.​—2Cr 29:1, 3, 12, 15, 16.

11. Maysa kadagiti sumagmamano a Simeonita a panguluen a puersado nga innalada ti daga ti sumagmamano a Hamita ken Meunim, idi kaaldawan ni Ezekias, tapno mapalawada ti pagpaarabanda.​—1Cr 4:24, 35, 38-41.

12. Maysa kadagiti annak ni Nebo a nangpapanaw iti ganggannaet nga assawada a babbai ken annakda idi kaaldawan ni Esdras.​—Esd 10:43, 44.

13. Maysa a manangaywan kadagiti Benjamita nga agnanaed idiay Jerusalem idi gobernador ni Nehemias; anak ni Zicri.​—Ne 11:4, 7-9.