JOSEB-BASSEBET

Ti pannakaulo dagiti tallo a naisangsangayan unay a nabileg a lallaki ni David. (2Sm 23:8) Iti 1 Cronicas 11:11 isu ket naawagan iti Jasobeam, a nalabit dayta ti ad-adda nga umiso a porma ti naganna. Adda dadduma pay a parikut iti panangisurat ti eskriba iti teksto iti 2 Samuel 23:8, isu a kasapulan a mailinteg ti di nalawag a Hebreo iti Masoretiko a teksto (nga agparang a pakabasaan iti, “Isu ni Adino nga Eznita”) tapno mabasa nga “Iwaswasawasna ti pikana.” (NW) Kasta met laeng ti mabasa iti dadduma pay a moderno a patarus. (AT; RS; Mo; Ro, ftn; JB) Ngarud ti Samuel naitunos iti libro ti Cronicas ken ti wagas a pannakaisurat daytoy a paset ti kasuratan. “Dagiti tallo” ti mapagsasaritaan ditoy, ngem agbalinen nga uppat no mairaman ti sabali pay a nagan nga Adino. Kanayonanna pay, tunggal maysa kadagiti tallo a nabileg a lallaki ket adda natukoy a maysa a gapuananna, isu a no ti panangparmek iti 800 ket maikuna a gapuanan ti sabali, awanen ti gapuanan ni Joseb-bassebet (Jasobeam).​—Kitaenyo ti JASOBEAM Num. 2.

Adda posibilidadna a ti naikuna a gapuanan ni Joseb-bassebet iti 2 Samuel 23:8 ket naiduma a pasamak iti nadakamat iti 1 Cronicas 11:11. Mabalin a daytoy ti makagapu no apay a ti salaysay iti Samuel dakamatenna ti 800 a napapatay, idinto ta ti salaysay iti Cronicas tukoyenna ti 300 a napapatay.