KIBROT-HATAAVA

[Dagiti Lugar a Pagitabonan ti Panaggartem].

Lugar iti let-ang a nagpakarsuan dagiti Israelita, a sadiay nga impakita ti naglalaok a bunggoy ti kinagaramugamda iti taraon ti Egipto. (Nu 11:4; 33:16, 17; De 9:22) Kadawyan a maikunkuna nga isu dayta ti Rueis el-Eberij, nga adda iti gistay nagtengngaan ti Jebel Musa, ti ibagbagada nga ayan ti Bantay Sinai, ken Hazerot. Sadiay namilagruan a nangipaay ni Jehova iti makabulan nga abasto a pugo agpaay iti intero a pakarso. (Nu 11:19, 20, 31) Ngem nakaag-agum dagiti umili ta “daydiay kabassitan ti naummong nakaurnong iti sangapulo a homer” (2,200 L; 62 bu). Kunaen ti rekord a bayat nga “adda pay laeng ti karne iti nagbabaetan dagiti ngipenda, sakbay a mangalngal, . . . rinugian ni Jehova a kinabil dagiti umili iti dakkel unay a pananggudas.” Imbes a ti tuktukoyenna ket literal a ngalngalngalenda pay laeng ti insakmolda, mabalin a kayatna a sawen a sakbay nga “awanen” wenno “naibusen” ti intero a pagtaraon a karne (AT, RS), agsipud ta ti Hebreo a sao a naipatarus a “mangalngal” kangrunaan a kaipapananna ti ‘maguped.’ Kalpasan daytoy, naitabon dagiti natay, isu a ti disso a nakaitabonanda ket naawagan iti Kibrot-hataava.​—Nu 11:32-35.